07.10.2026 | 23:48
Արթուր Դանիելյանը կալանավորվեց
Գյումրիում ավազակային հարձակման ենթարկված 70-ամյա տղամարդու վիճակը ծանր է
Հասարակություն
21.07.2021 | 15:49
Գիշերը՝ ժամը 4:45-ին Գյումրու Պարոնյան փողոցում գտնվող իր առանձնատանը ավազակային հարձակման ենթարկված 70-ամյա տղամարդու վիճակը ծանր է։
Այս մասին Factor.am-ին հայտնեց Գյումրիի բժշկական կենտրոնի տնօրեն Արմեն Իսահակյանը։ 1951 թվականին ծնված տղամարդուն հիվանդանոց են տեղափոխել ժամը 5:20-ին, նրան պատրաստվում են վիրահատել, հենց վիճակը կայունանա։
Արմեն Իսահակյանի տեղեկացմամբ, տղամարդը ստացել է աջ սրունքի հրազենային կոտորակային վնասվածք, սրունքի զույգ ոսկրերի վերին մեկ երրորդի բազմաբեկորային կոտրվածք։
Հիշեցնենք՝ անհայտ անձը, որը եղել է դիմակավորված, ժամը 4:45-ին տեխնիկական միջոցների գործադրմամբ, ապօրինի մուտք է գործել Պարոնյան փողոցում գտնվող տարեց ամուսինների առանձնատուն, արթնացրել ննջասենյակում այդ պահին քնած ամուսիններին, հրազենի սպառնալիքով նրանցից պահանջել գումար և ոսկեղեն։ Հափշտակելով տանտիրոջ կողմից ներկայացված գումարը՝ նա հրազենով կրակել է տանտիրոջ ոտքին ու դիմել փախուստի։ Տանտերը՝ մարմնական վնասվածքով, տեղափոխվել է բժշկական կենտրոն:
Գյումրու ոստիկանության Մուշ բաժին ահազանգել էր տանտիրուհին՝ տեղեկացնելով, որ ժամը 04:35-ի սահմաններում իր բնակության վայրում հնչել են կրակոցներ:
Դեպքի առթիվ ՀՀ քննչական կոմիտեի Շիրակի մարզային քննչական վարչությունում ՀՀ քրեական օրենսգրքի 175-րդ հոդվածի 3-րդ մասի 3-րդ կետով հարուցվել է քրեական գործ, որի նախաքննությունը հանձնարարվել է քննչական խմբին: Ամուսինները ճանաչվել են տուժող և ցուցմունք տվել դեպքի հանգամանքների շուրջ:
ՀՀ ոստիկանության ԶԼՄ-ների հետ կապի բաժնի պետ Զարզանդ Գաբրիելյանի տեղեկացմամբ, ձեռնարկվում են միջոցառումներ՝ հանցագործությունը բացահայտելու ուղղությամբ։
Արմիկ Մովսիսյան
