06.10.2026 | 10:49
ՊԵԿ-ը քննարկել է հարկային և մաքսային բարեփոխումների հաջորդ փուլը
Պետական պարտքը տարեսկզբի համեմատ աճել է 901 միլիոն դոլարով
Տնտեսություն
19.07.2021 | 18:08
Հայաստանի պետական պարտքը հունիսի 30-ի դրությամբ կազմել է 8 միլիարդ 869 միլիոն դոլար։ Այն նախորդ ամսվա՝ մայիսի համեմատ աճել է 53 մլն դոլարով։ Այս մասին տեղեկանում ենք Ֆինանսաների նախարարության հրապարակած տվյալներից։
Նշենք, որ տարեսկզբին պետական պարտքը կազմում էր 7 միլիարդ 968 միլիոն դոլար։
Այպիսով՝ ՀՀ պետական պարտքը տարեսկզբի համեմատ աճել է 901 մլն դրամով կամ 11,3 %-ով։
Պետական պարտքի մեծ մասը Կառավարության արտաքին պարտքն է, որը կազմում է 6 միլիարդ 209 միլիոն դոլար։ Սրա մեջ են մտնում արտաքին վարկերն ու փոխառությունները, ոչ ռեզիդենտների կողմից ձեռքբերված պարտատոմսերը, ոչ ռեզիդենտների կողմից ձեռք բերված արտարժույթային պետական պարտատոմսերը։
Տարեսկզբի համեմատ Կառավարության արտաքին պարտքն ավելացել է 610 միլիոն դոլարով։
Կառավարության ներքին պարտքը կազմում է 2 միլիարդ 194 միլիոն դոլար։ Սրա մեջ են մտնում ներքին վարկերն ու փոխառությունները, ռեզիդենտների կողմից ձեռք բերված պետական գանձապետական պարտատոմսերն ու արտարժութային պետական պարտատոմսերը։ Կառավարության ներքին պարտքը տարեսկզբի համեմատ աճել է 282,4 միլիոն դոլարով։
Պետական պարտքի 468 միլիոն դրամը Կենտրոնական բանկի պարտքն է։ Տարեսկզբի համեմատ այն ավելացել է 8,1 միլիոն դոլարով։
Հիշեցնենք, որ դեռևս փետրվարին ֆինանսների նախարար Ատոմ Ջանջուղազյանը հայտարարել էր, որ տարեվերջին բացարձակ թվով Կառավարության պարտքը կմոտենա 8,5 միլիարդին, իսկ պետական պարտքը կմոտեցնի մոտավորապես 8,9 միլիարդ դոլարին։
Այսպիսով՝ հունիսի տվյալներով կառավարության պարտքը արդեն իսկ կազմում է 8,4 միլիարդ դոլար, իսկ Պետական պարտքն ընդհանուր՝ 8,86 միլիարդ դոլար։ Ստացվում է, որ դեռևս տարվա 6-րդ ամսին պետական պարտքը գրեթե հասել է տարեվերջի համար նախանշված սահմանագծին։
Անժելա Պողոսյան
