Ռուսաստանի Դաշնության կրթության և գիտության նախարար Օլգա Վասիլևան նախօրեին հանդես եկավ ԱՊՀ տարածքում միասնական այբուբենի վերադառնալու առաջարկությամբ: Չնայած ռուս պաշտոնյայի առաջարկը վերաբերում է ԱՊՀ այն երկրներին, որոնք կիրիլյան գրերից անցում են կատարել լատինատառին, այնուամենայնիվ Հայաստանում այս առաջարկը լուրջ մտահոգությունների տեղիք տվեց:
Սա թերևս պայմանավորված է այն հանգամանքով, որ Կրեմլի բարձրաստիճան պաշտոնյաները հաճախ են բարձրաձայնում Հայաստանում ռուսաց լեզուն է՛լ ավելի տարածելու անհրաժեշտության մասին:
Ժամանակին էլ մեծ աղմուկ բարձրացավ «Ռուսաստանն այսօր» լրատվական գործակալության գլխավոր տնօրեն Դմիտրի Կիսելյովի՝ Հայաստանի Ազգային ժողովում արած հայտարարությունների պատճառով: Ռուսական քարոզչամեքենայի գլխավոր դերակատարը պահանջել էր Հայաստանում ավելացնել ռուսական դպրոցների թիվը և փոխել լեզվի մասին օրենքը:
Կինոռեժիսոր Տիգրան Խզմալյանը թեև համոզված է, որ հայոց այբուբենին որևէ բան չի կարող սպառնալ, այդուհանդերձ ասում է՝ պետք է զգուշանալ ռուս պաշտոնյաների նմանատիպ հայտարարություններից:
Իշխող Հանրապետական խմբակցության պատգամավոր Կարինե Աճեմյանը, մինչդեռ, հակադարձում է՝ ռուս պաշտոնյաները կարող են կարծիք հայտնել, բայց պարտադիր չէ, որ դա վերաբերի Հայաստանին:
Պատգամավորն այդ մտահոգությունները համարում է բարդույթների հետևանք:
Factor.am-ի անդրադադարձը թեմային՝ տեսանյութում:
Շողիկ Գալստյան
