06.06.2026 | 01:06
«Ուժեղ Հայաստանի» մասնակցությունը կվիճարկվի՞ Վարչական դատարանում, թե՞ ոչ․ «Հանրապետության» անդամը՝ իրենց որոշման մասին
Սպիտակում մեկնարկել է UPSHIFT միջազգային ծրագիրը․ ԼՈՒՍԱՆԿԱՐՆԵՐ
Հասարակություն
12.07.2021 | 22:25
Այսօր Սպիտակում մեկնարկել է դեռահասների զարգացման և համայնքային ներգրավածության խթանման «UPSHIFT Սպիտակ» ծրագիրը։ Այն Հայաստանում առաջին անգամ փորձարկվել է Գյումրիում՝ 2019 թվականի դեկտեմբերին, ՄԱԿ-ի մանկական հիմնադրամի՝ ՅՈՒՆԻՍԵՖ-ի և Գյումրու «Երիտասարդական նախաձեռնությունների կենտրոն» ՀԿ-ի կողմից։
Այս ծրագիրն իրագործվում է աշխարհի տարբեր երկրներում։ ՅՈՒՆԻՍԵՖ-ի երիտասարդների զարգացման ծրագրերի պատասխանատու Հասմիկ Ալեքսանյանի տեղեկացմամբ, ծրագրի ընդհանուր արժեքը 20 հազար դոլար է, այն նպատակ ունի բարձրացնել երիտասարդների ներգրավածությունը համայնքների խնդիրների լուծման ու զարգացման հարցում։
«Գյումրու երիտասարդական նախաձեռնությունների կենտրոն» ՀԿ նախագահ Արթուր Նաջարյանի տեղեկացմամբ էլ, «UPSHIFT Սպիտակ» ծրագրին մասնակցում են 12-18 տարեկան պատանիներ, որոնք ընդգրկված են ոչ միայն Սպիտակ համայնքնից, այլ հարակից գյուղական բնակավայրերից։ 10 թիմեր կներկայացնեն գաղափարներ, որոնցից կընտրվեն հինգը ու յուրաքանչյուրին կտրամադրվի 120 հազար դրամ իրագործման համար։
«Պատանիներն առաջ են քաշում այնպիսի գաղափարներ, որոնք իրենց անհանգստացնում են․ օրինակ՝ խաղահրապարակների, գրադարանների, ժամանցային վայրերի պակասի։ Մասնավորապես՝ կարող եմ նշել աուդիո գրադարանի ստեղծումը, գրադարան-սրճարանի, ֆուտբոլի դաշտի բարեկարգումը, փորձում են էկո-գրիչներ պատրաստել, ինչը հետագայում կդառնա ձեռնարկատիրական գործունեություն և դպրոցին ֆինանսական առումով կապահովի»,- ասաց Արթուր Նաջարյանը։
Արմիկ Մովսիսյան
