Արգիշտի Քյարամյանը նշանակվեց ՀՀ քննչական կոմիտեի նախագահ

Արգիշտի Քյարամյանը նշանակվել է ՀՀ քննչական կոմիտեի նախագահ: Այս որոշումն ընդունվել է կառավարության հուլիսի 12-ի արտահերթ նիստում:

Կառավարության մեկ այլ որոշմամբ` Հայկ Գրիգորյանը ազատվել է ՀՀ քննչական կոմիտեի նախագահի պաշտոնից:

Հայկ Գրիգորյանը քննչական կոմիտեի նախագահ էր նշանակվել 2018 թվականի հունիսի 10-ին:

Արգիշտի Քյարամյանը 2020թ. դեկտեմբերի 24-ից զբաղեցնում է  ՀՀ քննչական կոմիտեի նախագահի տեղակալի պաշտոնը:

Նշենք, որ Արգիշտի Քյարամյանը 2019 թվականի մարտի 1-ից եղել է ՀՀ պետական վերահսկողական ծառայության ղեկավարի օգնական։ Նույն թվականի ապրիլի 10-ից մինչև 2020 թվականի մայիսի 4-ը, ՀՀ վարչապետ Նիկոլ Փաշինյանի որոշմամբ, նշանակվել է ՀՀ պետական վերահսկողական ծառայության ղեկավարի տեղակալ՝ նշանակումից 5 օր անց սկսելով համատեղել պաշտոնը ՊՎԾ ղեկավարի ժամանակավոր պաշտոնակատարի պաշտոնի հետ։

2020 թվականի մայիսի 4-ին՝ Քյարամյանը 1 օրով նշանակվել էր Քննչական կոմիտեի նախագահի տեղակալ։ Մայիսի 5-ին ՊՎԾ նախկին ղեկավար Արգիշտի Քյարամյանը նշանակվել է Ազգային անվտանգության ծառայության տնօրենի տեղակալ։ Ընդամենը երկու օրում Քյարամյանը նախ ազատվեց ՊՎԾ պետի պաշտոնից, ապա նշանակվեց Քննչական կոմիտեի նախագահի տեղակալ։ Նա ժամեր անց ազատվեց ՔԿ նախագահի տեղակալի պաշտոնից, ստացավ գնդապետի կոչում ու զբաղեցրեց ԱԱԾ տնօրենի տեղակալի պաշտոնը։ Հունիսի 8-ից մինչև հոկտեմբերի 8-ն ընկած ժամանակահատվածում Քյարամյանը ղեկավարել է ԱԱԾ-ն։