ՌԴ քաղաքացին, որին Բաքուն մեղադրում է պատերազմում հայերին աջակցելու մեջ, հավաքագրվել է Ադրբեջանի հատուկ ծառայությունների կողմից

Բաքվի ծանր հանցագործությունների դատարանում նախօրեին ընթանում էր ՌԴ քաղաքացի Էդուարդ Դուբակովի նկատմամբ հարուցված շինծու քրեական գործով հերթական դատական նիստը։ Նշենք, որ Ադրբեջանը Դուբակովին մեղադրում է Արցախյան պատերազմում հայկական կողմից մասնակցելու մեջ ու նրան «վարձկան» համարում։

Հերթական նիստում, սակայն, մի շարք ուշագրավ հայտարարություններ են հնչել։ Տեղական լրատվամիջոցների հաղորդմամբ՝ այս նիստում ընթերցվել է Դուբակովի նախաքննական ցուցմունքը։

Նա, մասնավորապես, նշել է, որ հաշվի առնելով այն, որ ունի հայկական արմատներ, հայրն ազգությամբ հայ է, հետաքրքրվել է Հայաստանում ՈՄԱ կազմակերպությամբ, որը, իբր, «մարտիկների է պատրաստել՝ Լեռնային Ղարաբաղում ադրբեջանցիների դեմ կռվելու համար»։

Դուբակովը 2018 թվականին եկել է Հայաստան, անցել զինվորական պատրաստություն, իսկ հետագայում իրեն ուղարկել են Շուշի, Ստեփանակերտ ու այլ շրջաններ։ 2019թ․ նա կրկին եղել է Հայաստանում ու Արցախում։

Մեղադրական եզրակացության համաձայն՝ այս տարի հունվարի 14-ին նա Թուրքիայից ժամանել է Բաքու՝ իբր ահաբեկչական գործողություն իրականացնելու համար, սակայն ձերբակալվել է Ադրբեջանի հատուկ ծառայությունների կողմից։

Նշենք, որ Բաքուն ՌԴ քաղաքացի Էդուարդ Դուբակովի նկատմամբ քրեական գործ է հարուցել 214․-3․1 (ահաբեկչություն, ահաբեկչության ֆինանսավորում), 218․2 (մասնակցություն հանցավոր կազմակերպությանը, խմբավորմանը), 318․2 (պետական սահմանի անօրինական հատում) հոդվածներով։ Նրան սպառնում է մինչև 15 տարվա ազատազրկում։

Դատական նիստում հարցաքննվել են նաև վկաները, որոնք ականատես են եղել Դուբակովի ձերբակալությանը։ Նրանք նշել են, որ ՌԴ քաղաքացու մոտ պայուսակ է եղել, որում եղել են հայերեն ու ռուսերեն լեզուներով գրություններ, ինչպես նաև հեռախոս։ Փաստաթղթերի ուսումնասիրությունից պարզ է դարձել, որ հեռախոսի ստուգման արդյունքում «Արցախյան» անունով կոնտակտ է հայտնաբերվել, որի հետ Դուբակովը կապի մեջ է եղել։ Բացի այդ, Դուբակովը զանգահարել է ոմն Արտյոմի, Սամիր Միրզոյանի ու Զարյանի։

Դատական նիստում ինքը՝ Դուբակովը, հերքել է բոլոր մեղադրանքները՝ նշելով, որ դրանք շինծու են։ Դուբակովն ասել է, որ խոստովանական ցուցմունք է տվել ճնշումների պատճառով։

Նա հայտարարել է, որ 2018 թվականին Բելառուսում հավաքագրվել է Ադրբեջանի հատուկ ծառայությունների կողմից և այցելել Արցախ հենց նրանց հանձնարարությամբ։ Դուբակովի խոսքով՝ 2021 թվականի հունվարին իրեն կանչել են Բաքու՝ դրամական պարգևատրման և նոր հանձնարարություններ տալու համար, սակայն ձերբակալել են։

«2018 թվականին ինձ համագործակցության մեջ ներգրավեցին Ադրբեջանի հատուկ ծառայությունները։ Այդ համագործակցության շրջանակում ես առաջադրանքներ էի կատարում, այցելել եմ Հայաստան ու Ղարաբաղ»,- Դուբակովի խոսքերն է մեջբերում Meydan TV-ն։

Դատական հաջորդ նիստը տեղի կունենա հուլիսի 14-ին։ Նշվում է նաև, որ հետաքննության փուլում ՌԴ հյուպատոսական ծառայության աշխատակիցներին թույլատրել են այցելել Դուբակովին։ Բացի այդ, դիվանագիտական առաքելության ներկայացուցիչները հետևել են դատավարության ընթացքին։

Кавказский Узел-ն էլ իր հերթին փորձել է պաշտոնական մեկնաբանություն ստանալ Ադրբեջանում Ռուսաստանի դեսպանությունից, սակայն չի հաջողվել։

Էմմա Չոբանյան