Արմեն Չարչյանը կմնա կալանքի տակ․ Վերաքննիչ դատարանը մերժեց պաշտպանների բողոքը

Վերաքննիչ քրեական դատարանն այսօր հրապարակեց «Հայաստան» դաշինքի պատգամավորի թեկնածու, «Իզմիրլյան» բժշկական կենտրոնի տնօրեն Արմեն Չարչյանին կալանավորելու որոշման դեմ պաշտպանների ներկայացրած բողոքի վերաբերյալ որոշումը:  Չարչյանի պաշտպաններից Արամ Վարդևանյանը լրագրողների հետ զրույցում տեղեկացրեց, որ  դատարանը մերժել է պաշտպանների կողմից ներկայացված վերաքննիչ բողոքը: Այսպիսով, Արմեն Չարչյանը կմնա կալանքի տակ: Նշենք, որ բողոքը քննում էր դատավոր Լուսինե Աբգարյանը։

«Ցավոք, հերթական անգամ քաղաքական հետապնդման ագրեսիվ դրսևորման պայմաններում ունեցանք կալանավորման ֆետիշացում։ Բայց որքան էլ ճնշումներ գործադրեն, վստահ եղեք՝ Արմեն Չարչյանը լինելու է ազատության մեջ»,- նշեց Արամ Վարդևանյանը։

Չարչյանի մյուս պաշտպանը՝ Էրիկ Ալեքսանյանն ասաց՝ դատավոր Աբգարյանը պրոֆեսիոնալ է, բայց որոշումն իրենց համար անընդունելի է։ «Սա ծաղր է իրավաբանության նկատմամբ։ Պարոն Չարչյանին անազատության մեջ պահելու որևէ հիմք չկա»,- շեշտեց նա։

Հիշեցնենք․ «Հայաստան» կուսակցությունների դաշինքի պատգամավորության թեկնածու Արմեն Չարչյանը ձերբակալվել էր «Իզմիրլյան» ԲԿ-ի աշխատակիցներին ԱԺ արտահերթ ընտրություններին մասնակցելուն առերևույթ հարկադրելու դեպքի առթիվ ՀՀ ՀՔԾ-ում քննվող քրեական գործի շրջանակներում՝ ՀՀ քրեական օրենսգրքի 154.2-րդ հոդվածի 4-րդ մասի 2-րդ կետով նախատեսված հանցանք կատարելու կասկածանքով (ընտրողներին կաշառք տալը, ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը):

Հունիսի 23-ին դատարանը բավարարել էր ՀՔԾ քննիչի կողմից ներկայացված միջնորդությունը՝ Արմեն Չարչյանի նկատմամբ կալանավորումը որպես խափանման միջոց ընտրելու վերաբերյալ։

Մերի Մարտիրոսյան