ՍԴ-ն մերժել է դատավորների ինքնաբացարկի բոլոր միջնորդությունները

Սահմանադրական դատարանն աշխատակարգային նիստում քննել է դատավորների ինքնաբացարկի վերաբերյալ միջնորդությունները։

«Այս պահի դրությամբ հստակ կարող եմ ասել, որ մեկից ավելի միջնորդություններ են եղել և բոլորը մերժվել են»,- Factor TV-ին փոխանցեց Սահմանադրական դատարանի մամուլի խոսնակ Եվա Թովմասյանը։

Հարցին՝ ո՞ր դատավորներին է ինքնաբացարկի միջնորդություն ներկայացվել՝ նա նշեց․ «Աշխատակարգային նիստը բավական երկար է տևել և նիստի արձանագրությանը դեռևս չեմ ծանոթացել։ Առիթ եմ ունեցել Վահե Գրիգորյանին անձնապես այդ հարցը տալու․ նա պատասխանել է, որ կային մի քանի միջնորդություններ, բոլորը մերժվել են, այդ թվում՝ իրեն՝ Վահե Գրիգորյանին առնչվող միջնորդությունը»։

ՍԴ դատավոր Վահե Գրիգորյանի ինքնաբացարկի հարցը ՍԴ ներկայացրած դիմումի մեջ ներառել էր երկրորդ նախագահ Ռոբերտ Քոչարյանի գլխավորած «Հայաստան» դաշինքը։ Սակայն համաձայն օրենքի՝ ինքնաբացարկի հարցը Սահմանադրական դատարանում քննության առարկա կարող է դառնալ միայն այն դեպքում, եթե դատավորներից մեկը այդ հարցը բարձրացնի։ Ստացվում է, որ դատավորներից մեկը հանդես է եկել այդ միջնորդությամբ։ Նշենք, որ ինքնաբացարկի միջնորդության բավարարման համար պետք է ինը դատավորներից վեցը կողմ քվեարկեին։

Հիշեցնենք, որ հունիսի 20-ին կայացած ԱԺ արտահերթ ընտրությունների արդյունքների վիճարկման հարցով դիմումները բարձր դատարանը կքննի հուլիսի 9-ին։ ՍԴ է դիմել չորս ուժ՝ «Հայաստան» և «Պատիվ ունեմ» դաշինքները, «Զարթոնք» և «Հայոց Հայրենիք» կուսակցությունները։

Մերի Մարտիրոսյան