07.10.2026 | 23:48
Արթուր Դանիելյանը կալանավորվեց
Բաքուն շինծու քրեական գործ է հարուցել ևս 2 հայ գերու նկատմամբ՝ լրտեսության մեղադրանքով
Հասարակություն
06.07.2021 | 13:34
Ադրբեջանը շարունակում է շինծու քրեական գործեր հարուցել ապօրինաբար այդ երկրում պահվող հայ ռազմագերիների նկատմամբ։ Ադրբեջանական լրատվամիջոցների հաղորդմամբ՝ ևս երկու հայ գերու նկատմամբ հարուցված շինծու քրեական գործի քննությունն ավարտվել է։
Հայ գերիներ Դավիթ Դավթյանն ու Գևորգ Սուջյանը մեղավոր են ճանաչվել Ադրբեջանի քրեական օրենսգրքի 276 հոդվածով (լրտեսություն)։
Նախաքննությունն ավարտվել է, գործի նյութերն ուղարկվել են Բաքվի ծանր հանցագործությունների դատարան։ Քրեական գործը փոխանցվել է դատավոր Ալի Մամեդովին։ Նշվում է, որ շինծու գործով նախնական դատական նիստը տեղի կունենա հուլիսի 14-ին։
Հավելենք, որ Բաքվում շարունակվում են հայ ռազմագերիների տարբեր խմբերի նկատմամբ հարուցված շինծու քրեական գործերի դատավարությունները։ Արդեն նաև հրապարակված դատավճիռներ կան։ Մասնավորապես, լիբանանահայ Վիգեն Էուլջեքչյանը դատապարվել է 20 տարվա ազատազրկման, շիրակցի գերիներ Հրաչ Ավագյանն ու Գեղամ Սերոբյանը՝ 4 տարի ժամկետով ազատազրկման, ևս 12 գերիները՝ 6 ամիս ժամկետով ազատազրկման։ Վերջինները, սակայն, հուլիսի 3-ին վերադարձան Հայաստան։
Էմմա Չոբանյան
