17.09.2026 | 12:01
ԱՄՆ Ներկայացուցիչների պալատը հավանություն է տվել ՌԴ-ի դեմ «դժոխային պատժամիջոցների» մասին օրինագծին
Գյումրու փողոցներից մեկում հայտնաբերված նորածնի վիճակը բավարար է․ մորը դեռ չեն գտել
Հասարակություն
05.07.2021 | 16:09
Գյումրու «Ավզնոց» թաղամասի առանձնատներից մեկի դարպասների տակ շաբաթ օրը՝ առավոտյան ժամը 10:00-ի սահմաններում հայտնաբերված նորածին տղայի մայրը դեռ չի հայտնաբերվել, ոստիկանների որոնողական աշխատանքները շարունակվում են։ Այս մասին Factor.am-ին տեղեկացրին Շիրակի մարզի դատախազությունից։ Իսկ Գյումրու Մոր և մանկան ավստրիական հիվանդանոցից, որտեղ բուժվում է փոքրիկը, հայտնեցին, որ երեխայի վիճակը գնահատվում է բավարար։ Հիվանդանոցի բուժական գծով փոխտնօրեն Հասմիկ Խաչատրյանը տեղեկացրեց, որ նրան սկսել են կերակրել արհեստական կաթի խառնուրդով։
Հիվանդանոց տեղափոխելիս՝ երեխայի պորտալարը կտրված չի եղել, մեր զրուցակիցն ասաց, որ պորտալարից վարակ է անցել, սակայն կյանքին վտանգ չի սպառնում, երեխան ստանում է համապատասխան բուժում։
«Երեխան 4-5 ժամ եղել էր դրսում՝ սառած վիճակում, բարակ սավանով փաթաթված, կեղտոտ, փոշոտ, խոտի մնացորդներ կային նրա վրա։ Դա հիմք է տալիս ենթադրելու, որ ոչ մաքուր պայմաններում է մայրը ծննդաբերել, հավանաբար՝ դաշտային պայմաններում»,- ասաց Հասմիկ Խաչատրյանը։ Ըստ նրա՝ երեխայի ապագայի հետ կապված հարցերն առայժ մշուշոտ են։
Հիշեցնենք, որ նորածնին պատահաբար նկատել էր Գյումրու Շահումյան փողոցով անցնող մի բուժաշխատող։ Նա անմիջապես ահազանգել էր թե՛ ոստիկանություն, թե՛ շտապբուժօգնություն, որից հետո փոքրիկին տեղափոխել էին Գյումրու Մոր և մանկան ավստրիական հիվանդանոց։
Արմիկ Մովսիսյան
