12.03.2026 | 17:15
Զախարովան հայտարարել է, թե Երևանը հրաժարվել է արցախցիների համար ռուսական կողմի օգնությունից
Դուբայի ցուցահանդեսին մասնակցելու համար 91 մլն դրամ է ծախսվել. առանց մրցույթի պայմանագիր է կնքվել «Շարմ Հոլդինգ»-ի հետ
Տնտեսություն
05.07.2021 | 14:31
2021 թվականի հոկտեմբերին կմեկնարկի «Մտքերի միավորում, ապագայի ստեղծում» խորագրով «Դուբայ ԷՔՍՊՈ-2020» ամենամեծ բիզնես-մշակութային իրադարձությունը Դուբայում: Ցուցահանդեսին Հայաստանի մասնակցության կազմակերպման աշխատանքների ընդհանուր համակարգումն իրականացվում է ՀՀ էկոնոմիկայի նախարարության կողմից։
Պաշտոնական փաստաթղթերի ուսումնասիրությունից Factor.am-ին հայտնի դարձավ, որ այս ցուցահանդեսին մասնակցելու համար գերատեսչությունը ծառայություններ է ձեռք բերել մեկ անձից կատարվող գնման ընթացակարգով: Էկոնոմիկայի նախարարությունը «Շարմ Հոլդինգ»-ի հետ կնքել է 91 մլն դրամի ծառայությունների մատուցման պայմանագիր՝ առանց մրցույթ հայտարարելու:
Պետական կառույցներն առանց մրցույթի գնումներ կատարում են Գնումների մասին ՀՀ օրենքի 23-րդ հոդվածի 1-ին մասի 2-րդ կետի համաձայն, եթե արտակարգ կամ չնախատեսված այլ իրավիճակի առաջացման հետևանքով ծագել է գնման անհետաձգելի պահանջ և, արտակարգ կամ չնախատեսված այլ իրավիճակից ելնելով, գնման այլ ձևերի կիրառումը ժամկետի առումով անհնար է՝ պայմանով, որ նման պահանջը հնարավոր չէր օբյեկտիվորեն կանխատեսել։
Էկոնոմիկայի նախարարությունը «Դուբայ ԷՔՍՊՈ-2020»-ին մասնակցելու վերաբերյալ պայմանագիրը ստորագրել է 2019 թվականին և գերատեսչությունը բավականին ժամանակ ուներ մրցույթ հայտարարելու համար:
Մանրամասնելով 91 մլն դրամ արժեցող գնումը՝ նշենք, որ այն ներառում է ապրիլ, մայիս և հունիս ամսվա ծախսերը: Բովանդակության փուլի մշակման ծախսերը կազմում են 2 մլն 350 հազար դրամ: 18 մլն դրամ հատկացվել է տեսանյութերի պրոեկտների, վեց սցենարիստների, լեդ էկրանների և այլ ծախսերի համար: 15 մլն 250 հազար դրամ արժեցել են տաղավարային դեկորացիաների դիզայնն ոււ պատրաստումը, իսկ տաղավարային շինարարության համար առանձին հատկացվել է 1 մլն դրամ: 9 մլն 320 հազար դրամի շրջանակներում կազմակերպվելու է «Ազգային օր» միջոցառումը, 4,1 միլիոնով էլ համերգ է կազմակերպվելու: 5 մլն դրամով PR արշավ է կազմակերպվելու, իսկ 8,9 մլն դրամով վճարվելու է սպասարկող անձնակազմի աշխատավարձն ու հոգալու են գործողուման այլ ծախսեր: Շուրջ 2 մլն դրամ էլ նախատեսվել է չնախատեսված ծախսերի համար: Կազմակերպչի եկամուտը կազմում է շուրջ 10 մլն դրամ:
Անդրադառնալով «Դուբայ ԷՔՍՊՈ-2020»-ին՝ նշենք, որ համաշխարհային ցուցահանդեսի շրջանակում տեղի կունենա Made in Armenia քառօրյա ցուցահանդեսը, որտեղ կներկայացվի հայկական արտադրանքը:
Նարեկ Կիրակոսյան
