Քաղաքականություն
01.07.2021 | 18:24
Ադրբեջանը սկսել է հետաքրքրություն ցուցաբերել ՀԱՊԿ Խորհրդարանական վեհաժողովի նոր ձևաչափի նկատմամբ։ Նշենք, որ Հավաքական անվտանգության պայմանագրի կազմակերպության (ՀԱՊԿ) Խորհրդարանական վեհաժողովը (ԽՎ) նախատեսում է ստեղծել գործընկեր պետությունների ինստիտուտ, որը ՀԱՊԿ ԽՎ-ում խորհրդատվական ձայն կստանա: Այս մասին այսօր հայտարարել էր ՀԱՊԿ ԽՎ նախագահ, ՌԴ Պետդումայի խոսնակ Վյաչեսլավ Վոլոդինը։
«Առաջարկվում է դիտարկել ՀԱՊԿ Խորհրդարանական վեհաժողովի համար գործընկերության նոր ինստիտուտ ստեղծելու հարցը: Նրանք կստանան խորհրդատվական ձայնի իրավունք, մասնակցություն փաստաթղթերի պատրաստմանը և կոլեկտիվ որոշումների մշակմանը»,- ասել էր Վյաչեսլավ Վոլոդինը կազմակերպության խորհրդի նիստում:
ՌԻԱ Նովոստիի փոխանցմամբ՝ նիստից հետո լրագրողների հետ զրույցում ՌԴ Պետդումայի ԱՊՀ հարցերով հանձնաժողովի նախագահ Լեոնիդ Կալաշնիկովը նշել է, որ այս նոր ձևաչափի նկատմամբ հետաքրքրություն են ցուցաբերում շատ երկրներ, բայց անվանել է նրանցից երկուսին՝ Ադրբեջան և Պակիստան։
«Որպես կանոն՝ այդ մասին ընդունված չէ խոսել։ Օրինակ՝ նույն Պակիստանը վաղուց էր ուզում լինել դիտորդի կարգավիճակում, և հիմա կարող է լինել գործընկերոջ կարգավիճակում»,- ասել է Կալաշնիկովը՝ նշելով, որ դիտորդների ու գործընկերների իրավունքները տարբեր են լինելու։
Ի դեպ, այժմ ՀԱՊԿ Խորհրդարանական վեհաժողովում, բացի անդամ երկրներից, ներառված են միայն դիտորդ երկրներ՝ Սերբիան ու Աֆղանստանը։
Էմմա Չոբանյան
