Պետք է պատժամիջոցներ կիրառել Ադրբեջանի նկատմամբ, զրկել ԵԽ-ում ձայնի իրավունքից՝ գերիների խնդրի համար. Նաիրա Զոհրաբյան. ՏԵՍԱՆՅՈՒԹ

ՀՀ ազգային ժողովի պատգամավոր Նաիրա Զոհրաբյանը միջազգային հանրությանը վստահեցնում է, որ գերիներին վերադարձնելու միայն կոչերն արդյունք չեն տալու և հորդորում է կոնկրետ պատժամիջոցներ կիրառել Ադրբեջանի, Իլհամ Ալիևի և նրա ընտանիքի նկատմամբ: Այս մասին պատգամավորն ասաց ԱԺ-ում լրագրողների հետ զրույցում:

Զոհրաբյանը հիշեցրեց ԵԽԽՎ-ում ադրբեջանական պատվիրակության ղեկավարի հետ իր առանձնազրույցի մասին: «Իրենք որպես առաջնային քայլ նշում էին, որ Հայաստանը պետք է ճանաչի Ադրբեջանի տարածքային ամբողջականությունը՝ Արցախի գրավյալ տարածքներով»,- նշեց Զոհրաբյանը՝ հավելելով, որ որևէ ադեկվատ իշխանություն նման քայլի չպետք է գնա:

Ի՞նչ  պետք է անել, ի՞նչ հնարավորություն կա՝ ռազմագերիներին վերադարձնելու համար. Զոհրաբյանի կարծիքով դեռ կա մի կարևոր գործիք: «Կարևոր գործիքը միջազգային հանրության իրական պատժամիջոցներն են: Եվրոպայի խորհրդում հանդիպելով Եվրոպական միության տարբեր պաշտոնյաների հետ, նաև լիագումար նիստում, քաղաքական խմբերում՝ ես առաջարկել եմ դադարեցնել անատամ հայտարարությունները, հորդորները, կոչերը»,- նշեց Զոհրաբյանը՝ հավելելով, որ, իհարկե, քաղաքակիրթ երկրի համար այդ կոչերը կարող էին լինել բավարար, սակայն Ադրբեջանը ռազմական հանցագործ երկիր է:

Զոհրաբյանի դիտարկմամբ՝ միակ գործոնը, լծակը, որը գուցե հնարավորություն տա գործընթացը արագացնել, կարող է լինել Ադրբեջանի նկատմամբ շատ կոնկրետ պատժամիջոցի կիրառումը: Պատգամավորը նկատեց, որ եվրոպական կառույցները դա պարբերաբար անում են ՌԴ-ի, Բելառուսի հանդեպ: «Օրինակ ինչո՞ւ չկասեցնել Մեծ Բրիտանիայում, եվրոպական բանկերում Ալիևի, նրա ընտանիքի և Ադրբեջանի քաղաքական էլիտայի բանկային հաշիվները: Ինչո՞ւ չկասեցնել ադրբեջանական պատվիրակության լիազորությունները կամ պատվիրակությանը զրկել ձայնի իրավունքից Եվրոպայի խորհրդում»,- նշեց պատգամավորը:

Մանրամասները՝ տեսանյութում: