Տնտեսություն
30.06.2021 | 17:56Կենտրոնական բանկի տեսանկյունից փոխարժեքը կարևոր գործոն չէ, կարևոր է գների կայունությունը: Փոխարժեքն ընդամենը ազդող գործոններից մեկն է, որը կարող է ուղղակի ազդեցություն ունենալ գների կայունության վրա: Այսօր Ազգային ժողովում 2020թ. բյուջեի կատարողականի քննարկման ժամանակ, պատասխանելով «Իմ քայլը» խմբակցության պատգամավոր Արման Եղոյանի հարցին, այս մասին նշեց ԿԲ նախագահ Մարտին Գալստյանը։
«Հայաստանում փոխարժեքը լողացող է, ինչը ինչը տնտեսվարողներին թույլ է տալիս լինել ավելի ճկուն: Փոխարժեքի տատանումներն այստեղ այնքան կտրուկ չեն, որքան Հայաստանի հետ համադրելի այլ երկրներում: Հաշվի առնելով այն միջավայրը, որում մենք հայտնվել ենք 2020թ-ին` պանդեմիա և պատերազմ, կարծում եմ, որ փոխարժեքի տատանումները Հայաստանում այդքան զգալի չեն եղել»,- նշեց Գալստյանը:
Ինչ վերաբերում է վերջին ժամանակահատվածում դրամի արժևորմանը, ապա, ԿԲ նախագահի խոսքով, գործոնները մի քանիսն են ու բխում են հենց պահանջարկից ու առաջարկից։ «Այս պահի դրությամբ արտարժութային միջոցների առաջարկն ավելի մեծ է, քան պահանջարկը»,- ասաց ԿԲ նախագահը։
Գալստյանի խոսքով` դա պայմանավորված է նրանով, որ գործընկեր երկրներում տնտեսական աճը բավական բարձր է, մեծ ծավալի տրանսֆերտներ են գալիս Հայաստան, բացի դրանից՝ Հայաստանում ներկա պահին ակտիվացել է զբոսաշրջությունը։ Եվ երրորդ կարևոր գործոնն այն է, որ պղնձի գինն այս պահին գտնվում է իր պատմական մաքսիմումի մակարդակի վրա։
Մանրամասները՝ տեսանյութում:
