Խափանման միջոցի նոր տեսակ կկիրառվի՝ տնային կալանք. ԱԺ-ն ընդունեց քրեական դատավարության օրենսգիրքը

ԱԺ արտահերթ նիստում երկրորդ ընթերցմամբ և ամբողջությամբ ընդունվեց ՀՀ քրեական դատավարության օրենսգիրքը և կից ներկայացված օրենքների նախագծերի փաթեթը: ԱԺ նիստում այն ներկայացրեց ՀՀ արդարադատության նախարարի տեղակալ Արմեն Հովհաննիսյանը:

Փոխնախարարն ընդգծեց, որ նախատեսված սկզբունքային նորամուծությունները պետք է էապես բարելավեն ու կատարելագործեն քրեակատարողական գործող համակարգը՝ ապահովելով քրեական արդարադատության արդյունավետության բարձրացումը:

Ընդլայնվել է խափանման միջոցների շրջանակը: Հովհաննիսյանը, ներկայացնելով նախատեսվող փոփոխությունները, նշեց, որ նախատեսվում է կիրառել խափանման միջոցների այնպիսի նոր տեսակներ, ինչպիսիք են տնային կալանքը և վարչական հսկողությունը: «Նախագծով նախատեսվում է վերացնել քրեական գործի հարուցման փուլը, այն ներառել նախաքննության՝ որպես մինչդատական վարույթի իրականացման միակ ձևի բովանդակության մեջ: Նախատեսվում է վերացնել հետաքննությունը՝ որպես վարույթի ինքնուրույն փուլ: Նախագծով հստակեցվել են հարկադրանքի միջոցների՝ ներառյալ ձերբակալման, կալանքի կիրառման նպատակները, հիմքերը և ընթացակարգերը»,- ասաց փոխնախարարը:

Վերանայվել են ձերբակալման տեսակները, որպես ձերբակալման առանձին տեսակ նախատեսվել է ազատության մեջ գտնվող մեղադրյալին դատարան ներկայացնելու համար ձերբակալումը: Հնարավորինս ընդլայնվել է խափանման միջոցների շրջանակը:

«Նախատեսվել են խափանման միջոցների այնպիսի նոր տեսակներ, ինչպիսիք են տնային կալանքը և վարչական հսկողությունը: Հնարավորինս հստակեցվել են խափանման միջոցների կիրառման պայմանները և ընթացակարգերը՝ կալանքը որպես խափանման միջոց կիրառելու չհիմնավորված դեպքերը բացառելու համար»,- նշեց Հովհաննիսյանը:

Նա նաև հավելեց, որ ներդրվելու է մեղադրյալի բացակայությամբ հեռակա վարույթի ինստիտուտը: