05.08.2026 | 19:00
Ծովագյուղում ապօրինի պահվող գայլերը տեղափոխվել են Երևանի կենդանաբանական այգի․ քաղաքացին տուգանվել է
Հայաստանից տարբեր փաստաբաններ պատրաստակամություն են հայտնել մեկնել Բաքու՝ պաշտպանելու հայ ռազմագերիներին
Հասարակություն
28.06.2021 | 17:10
Հայաստանից շուրջ 40 փաստաբան պատրաստ է մեկնել Բաքու՝ հայ ռազմագերիների պաշտպանությամբ հանդես գալու նպատակով:
Փաստաբանների պալատի նախագահ Արա Զոհրաբյանը Factor.am-ի հետ զրույցում նշեց, որ այս հարցում արդյունքի հասնելու համար պետք է համագործակցություն լինի պատրաստակամություն հայտնած փաստաբանների, ՄԻԵԴ-ում ռազմագերիների շահերը ներկայացնող փաստաբանների և պետական իրավասու մարմինների միջև:
Արա Զոհրաբյանի խոսքով՝ այնուամենայնիվ, Բաքու մեկնելու համար անհրաժեշտ է Ադրբեջանի իշխանությունների համաձայնությունը․ «Այստեղ է, որ ՀՀ պետական մարմինների և միջազգային կառույցների օգնության կարիքն ունենալու ենք»։
Փաստաբանների նպատակն է տեսակցել հայ ռազմագերիներին, տրամադրել խորհրդատվություն Եվրոպական դատարանի հետ կապված և արձանագրել Եվրոպական կոնվենցիայով երաշխավորված իրենց իրավունքների խախտումները։
Թե քանի ռազմագերի կա Բաքվում՝ Զոհրաբյանը տեղեկություն չունի, սակայն, ինչպես ինքն է նշում՝ ամեն ինչ անելու են, որպեսզի հայ ռազմագերիների վիճակը բարելավվի: «Ակնհայտ է, որ շինծու քրեական գործերով Ադրբեջանը փորձում է մեր հայրենակիցներին չվերադարձնել Հայաստան»,- ասաց նա։
Արփի Հակոբյան
