Մարությանի՝ Աջափնյակում գործող «բանդայի» մասին հայտարությունը կապ ունի՞ թաղապետի ազատման հետ․ ՏԵՍԱՆՅՈՒԹ

Երևանի քաղաքապետ Հայկ Մարությանը հունիսի 22-ի ավագանու նիստում հայտարարեց, թե Աջափնյակ վարչական շրջանում «բանդա» է գործում, որի անդամները խոչընդոտում են ապօրինի կառույցներն ապամոնտաժելու աշխատանքներ իրականացնել։ Մարությանը նաև ասաց, թե երբ քաղաքապետարանի աշխատակիցները փորձել են ապամոնտաժման աշխատանքներ իրականացնել, անգամ եղել է իրավիճակ, երբ նրանց կյանքին վտանգ է սպառնացել։

«40-50 հոգի ոչ սթափ վիճակում, զինված, ուղղակի հարձակվել են մեր 7-8 աշխատակցի ու 2 ոստիկանի վրա»,- հայտնեց նա։

Քաղաքապետի այս հայտարարությունից հետո՝ արդեն երեկոյան Երևանի քաղաքապետարանից հայտնեցին, որ Աջափնյակում կատարվել են ապամոնտաժման աշխատանքներ։ Տարածված տեսանյութում երևում է, որ ապամոնտաժման աշխատանքները կատարվում են մեծ թվով ոստիկանների ուղեկցությամբ։

Այսօր մամուլը գրեց, թե երեկ երեկոյան, Մարությանի հայտարարությունից հետո, աշխատանքից ազատման դիմում են գրել Աջափնյակ վարչական շրջանի ղեկավար Հայկ Մհրյանն ու նրա տեղակալը։ Ամբողջ օրը մեր հեռախոսազանգերը Մհրյանը թողեց անպատասխան։ Factor TV-ի նկարահանող խումբը Աջափնյակի թաղապետարանում պարզեց, որ այսօր ո՛չ Մհրյանը, ո՛չ էլ նրա երկու աշխատակիցները աշխատանքի չեն ներկայացել։

Թաղապետի երկու տեղակալները, պարզվեց, աշխատանքից ազատվել են դեռ երեկ․ իրենց սեփական դիմումի համաձայն, թե՞ թաղապետի որոշմամբ, մեզ հստակ չպատասխանեցին։ Թաղապետարանի աշխատակազմի ղեկավարն էլ ասաց՝  տեղեկություն չունի, թե ինչու այսօր Մհրյանն աշխատանքի չի ներկայացել։

Ավելի ուշ մեզ հաջողվեց կապ հաստատել Երևանի քաղաքապետի խոսնակ Հակոբ Կարապետյանի հետ, որն ասաց, որ Մհրյանն աշխատանքից ազատման դիմում գրել է երեկ առավոտյան և դա կապ չունի Մարությանի հայտարարության հետ։ Կարապետյանը նաև տեղեկացրեց, որ ապօրինի շենք-շինությունների ապամոնտաժման աշխատանքներն ավելի ինտենսիվ են դառնալու։ Նշենք, որ ըստ քաղաքապետի՝ միայն Աջափնյակում դեկտեմբերից մինչ օրս քանդվել և ապամոնտաժվել է 34 շենք-շինություն։ Քաղաքապետարանից հայտնում են, որ աշխատանքները կշարունակվեն բոլոր վարչական շրջաններում։

Մանրամասները՝ տեսանյութում։

Լիլիթ Շաբոյան