16.05.2026 | 20:00
ՀՀ ԱԳ փոխնախարարը ԵԽ գլխավոր քարտուղարին է հանձնել «Մարզական մրցումների մեքենայությունների մասին» կոնվենցիայի վավերագիրը
Բաքվում մեկնարկել է շիրակցի 14 ռազմագերիների դատավարությունը․ ԼՈՒՍԱՆԿԱՐՆԵՐ
Հասարակություն
16.06.2021 | 15:47
Բաքվի ծանր հանցագործությունների դատարանում մեկնարկել է շիրակցի 14 ռազմագերիների նկատմամբ հարուցված շինծու քրեական գործի դատավարությունը։ Ադրբեջանական լրատվամիջոցների հաղորդմամբ՝ դատավոր Աֆղան Հաջիևի նախագահությամբ ընթացող նիստում մեղադրյալների անձնական տվյալներն են ճշտվում։
Հայ ռազմագերիներն են՝ Հրաչյա Ավագյանը, Գեղամ Սերոբյանը, Արմեն Բաբասյանը, Գոռ Գասպարյանը, Կամո Սեֆիլյանը, Վոլոդյա Հակոբյանը, Գևորգ Ասատրյանը, Սիսակ Ենգոյանը, Ալբերտ Պետրոսյանը, Ռոմիկ Սեդրակյանը, Արամ Մինասյանը, Մկրտիչ Մինասյանը, Էդգար Մաթեսյանը, Յուրի Կարապետյանը։
Նշենք, որ պաշտոնական Բաքուն շինծու քրեական գործեր է հարուցել հայ գերիների նկատմամբ՝ ահաբեկչություն, դիվերսիա ու այլ հանցագործություններ իրականացնելու մեղադրանքով։
Հիշեցնենք, որ Բաքուն նախ շինծու քրեական գործ հարուցեց 14 շիրակցի գերիների, ապա՝ ևս 13-ի նկատմամբ։ Նրանց դատավարությունը տեղի կունենա հունիսի 22-ին։ Այնուհետև Ադրբեջանի Պետանվտանգության ծառայությունն ու Գլխավոր դատախազությունը հայտարարեցին, որ ևս 26 շիրակցի ռազմագերիների դեմ հարուցված քրեական գործերի նախաքննությունն ավարտել ու գործերն ուղարկել են դատարան։
Հիշեցնենք՝ Հադրութի Հին Թաղեր ու Խծաբերդ բնակավայրերում դեկտեմբերին, ռազմական գործողությունների ավարտից հետո, Շիրակի մարզի տարբեր համայնքներից 62 զինծառայողներ գերեվարվեցին Ադրբեջանի կողմից։ Նրանց նկատմամբ Ադրբեջանի իշխանությունները տարբեր քրեական գործեր են հարուցել, որակել են դիվերսանտներ ու հրաժարվում են վերադարձնել։ 9 շիրակցիներ արդեն վերադարձել են․ հունվարի 28-ին Հայաստան վերադարձավ 5 շիրակցի գերի, փետրվարի 8-ին՝ ևս 5 գերի, որոնցից 3-ը՝ Գյումրիից։ Եվս մի խումբ՝ 3 ռազմագերի, Հայաստան վերադարձավ մայիսի 4-ին․ նրանցից մեկը Շիրակի մարզից է։ Հունիսի 12-ին էլ Ադրբեջանը Հայաստանին վերադարձրեց 15 ռազմագերու, որոնց մեջ շիրակցիներ չկային։
Մյուս գերիները շարունակում են մնալ Ադրբեջանում։ Փաստորեն, ստացվում է, որ Անդրբեջանում մնացած բոլոր շիրակցի ռազմագերիների նկատմամբ Բաքուն քրեական գործեր է հարուցել։
Էմմա Չոբանյան
