14.09.2026 | 18:19
Փաշինյանն ու Բունդեսթագի պատվիրակությունը քննարկել են Հայաստան–Գերմանիա և Հայաստան–ԵՄ հարաբերությունները
Պետական պարտքը տարեսկզբի համեմատ աճել է 848 մլն դոլարով
Տնտեսություն
15.06.2021 | 15:17
Այս տարվա մայիսի վերջին ՀՀ պետական պարտքը կազմել է շուրջ 8 միլիարդ 816 մլն դոլար՝ տարեսկզբի համեմատ ավելանալով 848 մլն դոլարով կամ 10,6 %-ով։ Այս մասին տեղեկանում ենք Ֆինանսների նախարարության հրապարակած տվյալներից։
Մոտ 8,8 միլիարդ դոլար պետական պարտքից 8 միլիարդ 317 միլիոն դոլարը Կառավարության պարտքն է, 498,4 մլն դոլարը՝ Կենտրոնական բանկինը։
Տարեսկզբի համեմատ 656 մլն դոլարով ավելացել է Կառավարության արտաքին պարտքը՝ կազմելով 6 միլիարդ 225 մլն դոլար, իսկ Կառավարության ներքին պարտքը մայիսին կազմել է 2 միլիարդ 62 մլն դոլար՝ տարեսկզբի համեմատ ավելանալով 153 մլն դոլարով։
Կենտրոնական բանկի պարտքը մայիսին կազմել է 498,4 մլն դոլար։ Այն տարեսկզբի համեմատ աճել է 38.5 մլն դոլարով։ Իսկ նախորդ ամսվա՝ ապրիլի համեմատ պետական պարտքն ավելացել է 44 մլն դոլարով։
Հիշեցնենք, որ դեռևս փետրվարին ֆինանսների նախարար Ատոմ Ջանջուղազյանը հայտարարել էր, որ տարեվերջին բացարձակ թվով Կառավարության պարտքը կմոտենա 8,5 միլիարդին, իսկ պետական պարտքը կմոտեցնի մոտավորապես 8,9 միլիարդ դոլարին։
Այսպիսով՝ մայիսի տվյալներով կառավարության պարտքը արդեն իսկ կազմում է 8,3 միլիարդ դոլար, իսկ Պետական պարտքն ընդհանուր՝ 8,8 միլիարդ դոլար։
Ստացվում է, որ դեռևս տարվա 5-րդ ամսին պետական պարտքը գրեթե հասել է տարեվերջի համար նախանշված սահմանագծին։
