Հայկ Սարգսյանը` նոր աղմկահարույց միջադեպի կենտրոնում. ինչ է սպասվում լրագրողի հեռախոսը խլելու համար․ ՏԵՍԱՆՅՈՒԹ

Պարբերաբար աղմկահարույց պատմությունների կենտրոնում հայտնվող իմքայլական պատագամավոր Հայկ Սարգսյանը երեկ խլել է «Հրապարակ» օրաթերթի լրագրող Անուշ Դաշտենցի հեռախոսը, երբ լրագրողը «Քաղաքացիական պայմանագիր» կուսակցության գրասենյակի մոտ նկատել է Հայկ Սարգսյանին և փորձել է նրան հարց ուղղել: Լրագրողը պնդում է՝ ինքը պատգամավորին միայն մեկ հարց է տվել՝ «ինչո՞ւ են ձախողվել գեներալ Մուրադովի բանակցությունները Բաքվում»:

Հայկ Սարգսյանը մոտ մեկ ժամ շարունակ իր մոտ է պահել իշխանություններին մշտապես քննադատող թերթի լրագրողի բջջային հեռախոսը, բացել գաղտնաբառն ու ջնջել տեսանկարահանումը: Անուշ Դաշտենցն ասում է, որ հեռախոսը պատգամավորից կարողացել է հետ վերցնել մեկ այլ ՔՊ-ականի միջամտությամբ:

«Հրապարակի» լրագրողը Factor TV-ի հետ զրույցում պատմեց, որ այդ միջադեպի ամբողջ ընթացքում ՔՊ գրասենյակի մոտ այլ անձինք էլ են եղել, թեև ոչ քաղաքական դեմքեր, բայց որևէ քայլ չեն ձեռնարկել Հայկ Սարգսյանի արարքը կանխելու համար:

Իշխանական պատգամավորը չի հերքում, որ իր և լրագրողի միջև միջադեպ է տեղի ունեցել: Հայկ Սարգսյանն ԱԺ-ում լրագրողների հետ զրույցում առանց զղջալու խոստավանեց, որ լրագրողի կամքին հակառակ՝ վերցրել է հեռախոսն ու ջնջել տեսանյութը: Հայկ Սարգսյանը չի կարծում, որ լրագրողի հեռախոսը խլելը, պաշտպանիչ կոդը բացելը և տեսանյութը ջնջելն անօրինականություն է: Պատգամավորի խոսքով՝ լրագրողն աշխատանքային ժամից դուրս միջամտել է իր անձնական կյանքին, ինչի իրավունքը չուներ:

Ինֆորմացիայի ազատության կենտրոնի ղեկավար Շուշան Դոյդոյանը Հայկ Սարգսյանի այս քայլը համարում է իշխանության ներկայացուցչին ոչ հարիր պահվածք:

Շուշան Դոյդոյանը, որը նախկինում զբաղեցրել է Անձնական տվյալների պաշտպանության գործակալության ղեկավարի պաշտոնը, շեշտում է՝ Հայկ Սարգսյանը, վերցնելով լրագրողի հեռախոսն ու տնօրինելով պարունակող տեղեկատվությանը, միջամտել է լրագրողի անձնական կյանքին և պետք է պատասխանատվության ենթարկվի:

Խոսքի ազատության պաշտպանության կոմիտեի նախագահ Աշոտ Մելիքյանը նշում է՝ եթե Հայկ Սարգսյանը պատասխանատվության ենթարկվեր շաբաթներ առաջ Ազգային ժողովում Yerevan Today-ի լրագրողի խոսափողը խլելու համար, ապա այս դեպքը տեղի չէր ունենա:

Աշոտ Մելիքյանը տրամաբանական չի համարում Հայկ Սարգսյանի այն հիմնավորումը, որ լրագրողն իրավունք չուներ նրան աշխատանքային ժամից դուրս նկարահանել: Փորձագետի խոսքով՝ եթե պաշտոնյան հանրային վայրում է, ապա պետք է պատրաստ լինի լրագրողների հետ շփմանը:

Հայկ Սարգսյանի կողմից լրագրող Անուշ Դաշտենցի հեռախոսը խլելու և տեսանյութը ջնջելու հրապարակումների հիման վրա ոստիկանությունում նյութեր են նախապատրաստվում: Ոստիկանությունից չնշեցին՝ պատգամավորը հրավիրվե՞լ է բացատրություն տալու, թե՝ ոչ:

Ի դեպ, Հայկ Սարգսյանը հայտնի է նաև լրատվամիջոցներին դատի տալու իր նախասիրությամբ: Նա տարբեր առիթներով լրատվամիջոցների դեմ մոտ մեկ տասնյակ դատական հայց է ներկայացրել՝ պահանջելով մեծ չափի գումար:

Մանրամասները՝ տեսանյութում։

Նարեկ Կիրակոսյան