«Հորդացող» ներդրումների ու ավելացած աշխատատեղերի հետքերով․ ինչ են ցույց տալիս թվերը և ինչի սպասել․ ՏԵՍԱՆՅՈՒԹ

«Երկնիշ տնտեսական աճն իհարկե լինելու է, Հայաստանն արդեն շինհրապարակ է, գյուղատնտեսությունը վայելում է մասշտաբային օժանդակություն, ներդրումները հորդում են, աշխատատեղերն ավելանում»: Էկոնոմիկայի նախարարի պաշտոնակատար Վահան Քերոբյանի գրառումն է՝ այս տարվա հունվար-ապրիլ ամիսներին մակրոտնտեսական ցուցանիշների վերաբերյալ օպերատիվ տվյալների հրապարակումից հետո։

Ըստ վիճակագրական կոմիտեի՝ այս տարվա ապրիլին տնտեսական ակտիվության ցուցանիշը, նախորդ տարվա նույն ամսվա համեմատ, աճել է 23,2%-ով, իսկ հունվար-ապրիլ ամիսներին, նախորդ տարվա նույն  ժամանակահատվածի համեմատ, աճը կազմել է 2,6%:

Ի՞նչ միտումներ են ցույց տալիս արձանագրված տվյալները, որքանո՞վ է վերականգնվում Հայաստանի տնտեսությունը նախորդ՝ ճգնաժամային տարվա համեմատ, արդյո՞ք ներդրումները հորդում են, աշխատատեղերն էլ՝ ավելանում։

Ներկայացնենք թվերով։ Աշխատաշուկայի ապրիլյան թվերը դրական տեղաշարժ են ցույց տալիս․ 2019 թվականի ապրիլի համեմատ՝ աշխատողների 5,7% աճ ունենք, իսկ հարկման բազայի աճը կազմում է 20%։

Ըստ տնտեսագետ Արմեն Քթոյանի՝ աշխատատեղերի նման աճն ու եկամտային մուտքերի ավելացումն առաջին հերթին պայմանավորված են հարկային վարչարարության բարելավմամբ։

Իշխանական պատգամավոր Բաբկեն Թունյանը համաձայն է կարծիքի հետ, որ աշխատատեղերի ավելացման մեջ մեծ դեր ունեն հարկային վարչարարության բարելավումն ու ստվերի կրճատումը, սակայն նշում է՝ նախորդ տարվա փակված աշխատատեղերի վերականգնում ևս նկատվում է։

Ինչ վերաբերում է ներդրումներին, Վիճակագրական կոմիտեն առաջին եռամսյակի վերաբերյալ տվյալները դեռևս չի ներկայացրել։ Մասնագետները նշում են՝ դարձյալ բազային էֆեկտի հաշվին հնարավոր է՝ աճ ունենանք, սակայն հորդացող ներդրումների մասին խոսելը դեռ վաղ է։

Տնտեսագետ Թադևոս Ավետիսյանի կարծիքով՝ քանի դեռ մեր անվտանգային հարցերը բարձիթողի վիճակում են, իսկ անորոշությունները՝ անսահման, չպետք է սպասել ներդրումների, այն էլ՝ հորդացող։ Նա հիշեցնում է՝ նախորդ տարի օտարերկրյա ներդրումների զուտ ներհոսքի նվազում ենք ունեցել։

Բաբկեն Թունյանն իր հերթին ընդգծում է՝ ներդրումները կարող են հենց ներդրման փուլում տեսանելի չլինել, և շատ դեպքերում արդյունքը կարող է երևալ, երբ այն սկսի գործել որպես բիզնես։

Ընդհանուր առմամբ, տնտեսագետները համակարծիք են այն հարցում, որ Հայաստանի տնտեսության իրական ծավալներն առայժմ վերականգնված չեն, և տնտեսական ակտիվության աճի մասին խոսելը դեռ վաղ է։

Հիշեցնենք, որ Կենտրոնական բանկն այս տարվա համար կանխատեսել է 1,4% տնտեսական աճ, սակայն ԿԲ նախագահ Մարտին Գալստյանն Ազգային ժողովում ունեցած ելույթի ժամանակ խոստովանեց՝ կանխատեսումներն ավելի հոռետեսական էին, քան այսօրվա իրականությունն է: Այսպիսով՝ Կենտրոնական բանկը հունիսի 15-ին կվերանայի տնտեսական ակտիվության ցուցանիշի վերաբերյալ կանխատեսումները, ըստ ամենայնի՝ բարձրացնելով կանխատեսված աճի ցուցանիշը։

Մանրամասները՝ տեսանյութում։

Անժելա Պողոսյան