18.11.2024 | 23:35
ԵՄ-ն ծրագրում է «քաղաքական առաքելություն» ուղարկել Վրաստան. Բորել
Մոսկովյան եռակողմ խորհրդակցության ժամանակ քննարկվել է 6 հայ զինծառայողներին վերադարձնելու հարցը․ ՊՆ
03.06.2021 | 18:22
Ռուսաստանի, Հայաստանի և Ադրբեջանի ներկայացուցիչների միջև հունիսի 2-ին եռակողմ խորհրդակցություններ են տեղի ունեցել։ Այս մասին Factor.am-ին հայտնեցին Պաշտպանության նախարարությունից։
Մեր աղբյուրի հաղորդմամբ՝ բանակցությունների օրակարգում եղել է նաև մայիսի 27-ին Գեղարքունիքի մարզի սահմանային հատվածում՝ ԶՈՒ N զորամասի պահպանության տարածքից ադրբեջանական ԶՈՒ զինծառայողների կողմից գերեվարված 6 հայ զինծառայողներին վերադարձնելու հարցը։
«Քննարկվել են հայ-ադրբեջանական սահմանային իրադրության, ինչպես նաև 6 հայ գերիների վերադարձի հետ կապված մի շարք հարցեր»,- նշեցին ՊՆ-ից։
Գերատեսչությունից, սակայն, չնշեցին, թե հայկական կողմից ովքեր են մասնակցել նախօրեի խորհրդակցություններին և ինչ փուլում են զինծառայողների վերադարձի հարցով բանակցությունները։
Նշենք, որ ՊՆ-ն այս մասին պաշտոնական հաղորդագրություն չի տարածել, մոսկովյան եռակողմ խորհրդակցությունների մասին հայտնել են ռուսական լրատվամիջոցները։ Մասնավորապես, ՌԻԱ Նովոստին, վկայակոչելով սեփական աղբյուրները, գրել էր, որ «Մոսկվայում տեղի ունեցած հանդիպմանը քննարկվել են Հայաստանի և Ադրբեջանի առանձին սահմանային շրջաններում ապաէսկալացման ուղիները։ Պայմանավորվածություն է ձեռք բերվել՝ շարունակել աշխատանքային շփումները»։
Արփի Հակոբյան
