01.11.2024 | 20:30
Ան«վեթինգ» դատավորները․ ԲԴԽ-ն չունի բարեվարքության ստուգում չանցած դատավորների ցուցակը. ՏԵՍԱՆՅՈՒԹ
Ինչու ԱԳ փոխնախարարները չեն ներկայացել Կառավարության նիստին․ պարզաբանում
Քաղաքականություն
03.06.2021 | 13:17
Կառավարության այսօրվա նիստին ԱԳ նախարարությունից որևէ ներկայացուցիչ չի մասնակցել։ ԱԳ նախարարի պաշտոնակատար Արա Այվազյանը, հիշեցնենք, ազատվել է պաշտոնից, իսկ փոխնախարարների բացակայության պատճառը վերջինների զբաղվածությունն է եղել։ Այս մասին Factor.am-ին ասաց ԱԳՆ լրատվության և հանրային դիվանագիտության վարչության պետ Սերոբ Բեջանյանը։
«Փոխնախարարներից մեկը գտնվում է գործուղման մեջ, մյուսները կարևոր աշխատանքային հանդիպումներ ունեին»,- նշեց նա։
Արա Այվազյանը հրաժարականի դիմում է ներկայացրել մայիսի 27-ին, մի քանի օր անց աշխատանքից ազատման դիմում է ներկայացրել նաև ԱԳ փոխնախարար Գագիկ Ղալաչյանը, ապա՝ ԱԳՆ խոսնակ Աննա Նաղդալյանը։ Դրանից հետո մամուլը գրեց, թե ԱԳ նախարարի մյուս տեղակալները ևս աշխատանքից ազատման դիմումներ են ներկայացրել։ Մեզ հետ զրույցում Սերոբ Բեջանյանը, սակայն, ասաց, որ բոլոր փոխարտգործնախարարներն այս պահի դրությամբ կատարում են իրենց պարտականությունները։
Հստակեցնող հարցին՝ նրանք աշխատանքից ազատման դիմումներ չե՞ն գրել, լրատվության պետն արձագանքեց․ «Դրանք տարբեր հարցեր են»։
Երեկ լուրեր տարածվեցին նաև, որ ՀՀ ԱԳՆ նախկին խոսնակ Աննա Նաղդալյանը մայիսի 27-ին նշանակվել է ԱՄՆ-ում ՀՀ արտակարգ և լիազոր դեսպանի տեղակալ։
ԱԳՆ-ից Factor.am-ին հայտնեցին, որ նման հրաման չկա։
«Աննա Նաղդալյանը ԱԳ նախարարության դիվանագետներից է, շարունակում է մնալ ՀՀ դիվանագետ՝ ԱԳՆ համակարգում։ Նա աշխատելու է դիվանագիտական կորպուսում, բայց թե ինչ պաշտոնում, երբ, ինչպես՝ կտեղեկանաք գրավոր հարցումով»,- նշեցին ԱԳՆ-ից։
Արփի Հակոբյան
