Բաքվի ռազմական դատարանում տեղի է ունեցել լիբանանահայ գերի Վիգեն Էուլջեքյանի գործով դատական նիստը

Բաքվի ռազմական դատարանում լիբանանահայ Վիգեն Էուլջեքյանի դեմ հարուցված քրեական գործի քննության գործընթացի շրջանակում հերթական դատական նիստն է տեղի ունեցել։

Ադրբեջանական լրատվամիջոցների փոխանցմամբ՝ նիստի ընթացքում դատավոր Էլբեյ Ալլահվերդիևի նախախագահությամբ հնչեցվել է մեղադրական եզրակացությունը, որից հետո մեղադրյալը ցուցմունք է տվել։ Հաղորդվում է, որ քրեական գործի նյութերում, իբր, կան լուսանկարներ ու տեսանյութեր, որոնք վկայում են Էուլջեքյանի՝ Արցախյան պատերազմում մասնակցության մասին, իբր՝ որպես «վարձկան»։ Դատական հաջորդ նիստը տեղի կունենա առաջիկա օրերին։

Նշենք, որ լիբանանահայ Վիգեն Էուլջեքյանն Ադրբեջանում պահվող հայ ռազմագերիներից է, որին պաշտոնական Բաքուն ներկայացնում է որպես հանցագործ։

Ավելի վաղ Ադրբեջանի Ազգային անվտանգության ծառայության Գլխավոր քննչական ծառայությունը հայտարարել էր, որ ավարտել է Էուլջեքյանի դեմ հարուցված քրեական գործի հետաքննությունը։ Նշվում է, որ 2020 թվականի սեպտեմբերի 29-ին Բեյրութում բնակվող Էուլջեքյանը, իբր, ընդունել է Հովակ Կիկիյանի առաջարկը՝ մասնակցել ռազմական գործողություններին որպես «վարձկան»՝ 2․500 դոլար վարձատրության դիմաց։ Էուլջեքչյանի նկատմամբ քրեական գործ է հարուցվել Ադրբեջանի Քրեական օրենսգրքի 114.3, 214.2.1, 318.2 հոդվածներով։ Դատարանի որոշմամբ՝ նրա նկատմամբ խափանման միջոց է ընտրվել կալանավորումը։ Մայիսի 5-ին էլ քրեական գործի մեղադրական եզրակացությունը հաստատվել և ուղարկվել է դատարան։

Էմմա Չոբանյան