19.12.2025 | 22:50
Իսրայելում ՌԴ քաղաքացի է ձերբակալվել Իրանի օգտին լրտեսության մեղադրանքով
5 էլեկտրաավտոբուսներ Եվրամիությունից, 63 «գազելներ»՝ ՌԴ-ից․ կփոխվի Գյումրու տրանսպորտային համակարգը
Տնտեսություն
19.05.2021 | 15:58
Մինչև սեպտեմբեր ամբողջությամբ կփոխվի Գյումրու տրանսպորտային համակարգը։ Եվրամիության աջակցությամբ ձեռք կբերվեն՝ 18-20 տեղանոց 5 էլեկտրական ավտոբուսներ, իսկ սուբվենցիոն ծրագրով՝ ՌԴ-ից կներկրվեն 63 «Gazelle Next» մակնիշի մեքենաներ։ Դրանք կլինեն 17 տեղանոց։ Այս մասին Factor.am-ին տեղեկացրեց Գյումրու քաղաքապետարանի տրանսպորտի բաժնի պետ Արտյոմ Սարգսյանը։
Մանրամասնելով այս երկու ծրագրերը՝ պաշտոնյան տեղեկացրեց, որ Եվրամիության ծրագրի նախնական արժեքը մոտ 450 հազար եվրո է։
Եվրամիության ծրագիրը, որը կոչվում է «Եվրամիությունը՝ հանուն կայուն և կանաչ կառավարման», փորձարկվելու է Գյումրի, Վանաձոր և Լեհաստանի Պիլա քաղաքներում։
Ավտոբուսների տեխնիկական բնութագրերը, ըստ մեր զրուցակցի, դեռ մշակման փուլում են։ Այս ծրագրի շրջանակում ձեռք բերվող 5 ավտոբուսների գործարկման հետ միաժամանակ կներդրվի միասնական տոմսի քարտային համակարգը։
Իսկ սուբվենցիոն ծրագրով, որի արժեքը 900 միլիոն դրամ է՝ 450 միլիոնը ներդնում է Գյումրու քաղաքապետարանը, 450 միլիոնը՝ ՀՀ կառավարությունը, քաղաքապետարանը ձեռք կբերի 63 միկրոավտոբուսներ։
«Առաջին մրցույթը շահել է «Մուլտի Մոթորս» ընկերությունը, պայմանագիրն արդեն կնքված է, ձեռք կբերի 56 «Gazelle Next» մակնիշի մեքենաներ։ 120 օրում պարտավորվում են ներկրել։
Երկրորդ մրցույթը տեղի է ունեցել երեկ, շահել են 2 կազմակերպություններ։ Տեսնելու ենք՝ որն է ավելի էժան գներով կարողանում փոխադրել, հավանությունը կտանք նրան։
Երկրորդ փուլում կներկրվեն 4 հատ սովորական, 3 հատ հաշմանդամություն ունեցող անձանց հարմարեցված միկրոավտոբուսներ։ Այսինքն՝ ընդհանուր թիվը 63 է, բայց մենք նաև անցած տարի էինք ձեռք բերել 3 նման միկրոավտոբուսներ», – ներկայացրեց Արտյոմ Սարգսյանը։
Քաղաքապետարանի պաշտոնյան նաև թվարկեց ռուսական արտադրության միկրոավտոբուսների առավելությունները։
«Ռուսաստանն ամբողջությամբ անցել է «գազելներ»-ի, դրանք շատ հարմարավետ են, շարժիչը, մյուս բոլոր մասերը ճարվող են, սպասարկումը էժան է՝ չինականից 5-10 անգամ էժան »,-նշեց Արտյոմ Սարգսյանը։
Մեր հարցին՝ 69 տրանսպորտային միջոցներն արդյոք բավարա՞ր են Գյումրու բնակիչներին լիարժեքորեն սպասարկելու համար, Արտյոմ Սարգսյանը պատասխանեց․ «Մեր երթուղային ցանցը դեռ պատրաստ չէ, պատրաստ կլինի մինչև սեպտեմբեր-հոկտեմբեր ամիսները։ Ամբողջ քաղաքով պիտի ունենանք 8-10 երթուղի։
Մենք ցանցը կկազմենք այս 69 ավտոբուսով, հետագայում, ինչպես խոստացել է Գյումրու քաղաքապետը, տրանսպորտային միջոցների ձեռքբերումը կլինի շարունակական»։
Արմիկ Մովսիսյան
