17.02.2026 | 23:22
ՀՀ ԱԳ նախարարի տեղակալը Հռոմում ներկայացրել է COP17-ի Հայաստանի նախագահության առաջնահերթությունները
Ստանիսլավ Զասն ու Վաղարշակ Հարությունյանն այսօր Սյունիքում տիրող իրավիճակն են քննարկել․ ՀԱՊԿ մամուլի քարտուղար
Քաղաքականություն
14.05.2021 | 15:54
Այսօր տեղի է ունեցել ՀԱՊԿ գլխավոր քարտուղար Ստանիսլավ Զասի երկրորդ հեռախոսազրույցը ՀՀ պաշտպանության նախարարի պաշտոնակատար Վաղարշակ Հարությունյանի հետ։ Factor TV-ի հետ զրույցում այս մասին ասաց ՀԱՊԿ մամուլի քարտուղար Վլադիմիր Զայնետդինովը։
«Քննարկվել է Սյունիքի մարզում տիրող իրավիճակը»,- նշեց նա՝ հիշեցնելով, որ մայիսի 13-ին էլ ՀԱՊԿ գլխավոր քարտուղարը հեռախոսազրույցներ է ունեցել ինչպես Վաղարշակ Հարությունյանի, այնպես էլ ՀՀ ԱԳ նախարարի պաշտոնակատար Արա Այվազյանի հետ։
Վլադիմիր Զայնետդինովն ընդգծեց, որ ՀԱՊԿ-ում ուշադիր հետևում են Հայաստանի Սյունիքի մարզի սահմանամերձ շրջաններում իրադրության զարգացումներին և, անհրաժեշտության դեպքում, Հավաքական անվտանգության պայմանագրի և ՀԱՊԿ Կանոնադրության դրույթներով նախատեսված անհրաժեշտ գործողություններ կձեռնարկվեն։
Զայնետդինովը հայտնեց նաև, որ ՀԱՊԿ քարտուղարությունը հայ-ադրբեջանական սահմանին տիրող իրավիճակի կապակցությամբ Հայաստանից որևէ դիմում կամ փաստաթուղթ չի ստացել։
Նշենք, որ ՀՀ Կառավարության աշխատակազմի տարածած հաղորդագրության համաձայն՝ «վարչապետի պաշտոնակատար Նիկոլ Փաշինյանն այսօր պաշտոնապես դիմել է ՀԱՊԿ Հավաքական անվտանգության խորհրդի գործող նախագահ Տաջիկստանի Հանրապետության նախագահ Էմոմալի Ռահմոնին՝ 1992 թվականի մայիսի 15-ի «Հավաքական անվտանգության մասին» պայմանագրի երկրորդ հոդվածի շրջանակում ՀԱՊԿ անդամ պետությունների դիրքորոշումները համակարգելու և առաջացած սպառնալիքի վերացման համար միջոցներ ձեռնարկելու նպատակով արտակարգ խորհրդատվություններ անհապաղ սկսելու մեխանիզմը գործադրելու համար: Վերոնշյալի մասին, ինչպես նաև ստեղծված իրավիճակի վերաբերյալ հանգամանալից տեղեկատվությամբ նամակներ ՀՀ վարչապետի պաշտոնակատարն այսօր հղել է նաև ՀԱՊԿ մյուս անդամ պետությունների ղեկավարներին»:
