31.12.2025 | 23:43
Ժողովուրդը հաղթելու է. Փաշինյանի ամանորյա ուղերձը․ ՏԵՍԱՆՅՈՒԹ
3 կմ խորանալ սահմանից՝ դա սենսացիա է․ այդպես ադրբեջանցիները Երևան կհասնեն. ռուսաստանցի քաղաքագետ
Քաղաքականություն
13.05.2021 | 21:20
Factor TV-ի հարցազրույցը ռուսաստանցի քաղաքագետ Մոդեստ Կոլերովի հետ
-Պարո՛ն Կոլերով, երեկ ադրբեջանական զորքերը ներխուժեցին ՀՀ տարածք, այժմ հրաժարվում են դուրս գալ: Բանակցությունները դեռ արդյունք չեն տվել։ Ձեր կարծիքով՝ ինչո՞ւ պատահեց այս միջադեպը: Ինչո՞ւ Սյունիքում ռուսական խաղաղապահ ուժերի ներկայությունը չզսպեց Ադրբեջանին:
-Խաղաղապահների մանդատի մեջ չի մտնում Հայաստանի պետական սահմանի հսկողությունը, և Դուք դա գիտեք։ Երկրորդ՝ եթե հակառակորդն անցել է Ձեր սահման՝ 3 կմ-ի չափով, ինչպես ասաց Նիկոլ Փաշինյանը, ուրեմն այդ սահմանը փաստացի չկա։ Եվ զարմանալի է, որ նրանք գնացել են 3 կմ-ի չափով, այլ ոչ թե 33։ Եթե պետական սահման կա, այն հսկվում է։ Նշանակում է, որ այդ սահմանը չի հսկվում, որովհետև նույնիսկ 3 մետրի չափով սահմանի հատումը խախտում է համարվում։ Լավ է, որ Հայաստանը պաշտոնապես բարձրացրեց այդ հարցը բարձր մակարդակով ՀԱՊԿ-ում։ Դա առնվազն լավ արդյունք է։ Բայց դա չի փոխում այն իրավիճակը, որ պարզվեց․ Ադրբեջանի հետ Հայաստանի սահմանը չի հսկվում, չի ֆիքսվում, և կարող է անպատիժ հաղթահարվել շատ մեծ խորությամբ։ Միանգամից հարց է առաջանում՝ եթե իրենք սահմանը խախտեին ոչ թե 3 կմ-ի չափով, այլ 1 կմ-ի չափով, դա որևէ մեկը կնկատե՞ր։ Եվ ինչո՞ւ են սահմանախախտման մասին խոսում տեղի իշխանությունները, որոնք դրա իրավասությունը չունեն, այլ ոչ թե սահմանապահ զորքերը։ Ինչո՞ւ։ Պատասխան չկա։
-Ըստ Ձեզ՝ ինչի՞ է ուզում հասնել Ադրբեջանը։
-Ադրբեջանն ուզում է և հետագայում էլ շահարկելու է իր հաղթանակը՝ մշտապես մեծացնելով իր հնարավորությունները։ Եվ որքան շուտ Հայաստանը սկսի հսկել և պաշտպանել իր սահմանը, այնքան քիչ կլինեն նման փորձերը։
-Ո՞ւմ է ձեռնտու ՀՀ սահմանին լարվածությունը։ Պարզ է, որ այս միջադեպի արդյունքում Փաշինյանի կառավարության վարկանիշը կնվազի։
-Եթե Դուք կարծում եք, որ ամբողջ աշխարհն ապրում ու մտածում է՝ ինչպես բարձրացնել կամ նվազեցնել Փաշինյանի վարկանիշը, սխալվում եք։ Փաշինյանն Ադրբեջանի ամենագլխավոր խնդիրը չէ։ Այդ երկիրը ռեալիզացնում է իր հնարավորությունները, և դա շարունակելու է անել նաև ապագայում՝ ցանկացած իշխանության օրոք։ Եվ դա այնքան ժամանակ, քանի դեռ Հայաստանի սահմանը փաստացի պաշտպանված չլինի։ Պաշտպանել սեփական սահմանը՝ խորհրդային հին քարտեզներով, դա անեկդոտ է, ուղղակի մուլտֆիլմ, անարգանք է հազարավոր երիտասարդ տղաների հիշատակի նկատմամբ, որոնք տվել են իրենց կյանքը։ Նրանք տվել են իրենց կյանքը, իսկ դուք փորձում եք փոխարինել իրենց կյանքը խորհրդային քարտեզներով։ 3 կմ խորանալ սահմանից՝ դա սենսացիա է․ այդպես նրանք Երևան կհասնեն։ Սա նշանակում է, որ իշխանությունն անկարող է պաշտպանել իր սահմանը, և ոչ մի թղթային քարտեզ այստեղ չի օգնի։
-Ռուսական կողմն արդյունավե՞տ է աշխատում Փաշինյանի կառավարության հետ։
-Ռուսաստանը չունի և չի ունենալու քաղաքական որոշիչ ազդեցություն Հայաստանի իրավիճակի վրա։ Հայաստանը ստիպված է լինելու համաձայնել, որ ընտրություններն իր ներքին գործն են։ Փաշինյանն իշխանության եկավ, միանշանակ, պատրաստի հակառուսական դիրքորոշումներով, և կարողացավ միավորել Սերժ Սարգսյանի դեմ ցույցերը՝ ոչ միայն որպես վատ ղեկավարի, այլ, իբրև թե, Ռուսաստանի խամաճիկի, բայց հետո ստիպված էր խոստովանել և մշտապես է խոստովանում, որ ռազմական, քաղաքական, պաշտպանական առումով, բացի ՌԴ-ից, այլ գործընկեր Հայաստանը չունի և չի կարող ունենալ։
Մերի Մարտիրոսյան
