Ռոբերտ Քոչարյանի և Արմեն Գևորգյանի գործով դատական նիստը կրկին հետաձգվեց

Երևանի ընդհանուր իրավասության դատարանը (Շենգավիթի նստավայր), նախագահությամբ դատավոր Աննա Դանիբեկյանի, այսօր կրկին հետաձգեց Ռոբերտ Քոչարյանի և Արմեն Գևորգյանի գործով դատական նիստը:

Ռոբերտ Քոչարյանի պաշտպան Արամ Վարդևանյանը միջնորդեց հետաձգել սույն գործով քննությունը և այն նշանակել հունիսի 20-ից հետո։ Պաշտպանը հիշեցրեց՝ հունիսի 20-ին երկրում տեղի են ունենալու արտահերթ խորհրդարանական ընտրություններ, որոնց մասնակցում է նաև Ռոբերտ Քոչարյանը՝ գլխավորելով «Հայաստան» դաշինքը։

Վարդևանյանը շեշտեց, որ Ռոբերտ Քոչարյանը, ինչպես և ընտրությանը մասնակցելու հայտ ներկայացրած յուրաքանչյուր անձ, ունի քարոզարշավ իրականացնելու սահմանադրական իրավունք, իսկ նախընտրական շրջանում նշանակված նիստերը կարող են խոչընդոտել նրա հանդիպումներին և քարոզարշավ իրականացնելուն։

Այս միջնորդության դեմ առարկեց մեղադրող Պետրոս Պետրոսյանը՝ շեշտելով, որ ընտրություններին մասնակցությունը չի կարող պատճառ դառնալ, որպեսզի գործի քննությունը տեղի չունենա:

Արմեն Գևորգյանի պաշտպանն էլ տեղեկացրեց, որ Գևորգյանն առողջական խնդիրներ ունի, և նիստը հետաձգելու միջնորդություն ներկայացրեց, ինչի դեմ դատախազը չառարկեց:

Իր հերթին դատավոր Դանիբեկյանը տեղեկացրեց, որ հաջորդ շաբաթ մասնակցելու է Արդարադատության ակադեմիայի դասընթացներին և չի կարողանա նիստ նշանակել: Արդյունքում հաջորդ դատական նիստը նշանակվեց մայիսի 25-ին՝ ժամը 13։00-ին։

Լիլիթ Շաբոյան