18.11.2024 | 14:28
Երևանի ակումբներում մի շարք խախտումներ են արձանագրվել
Մարտի 1-ի գործի շուրջ կրքերը չեն հանդարտվում․ դատախազները դիմել են Վերաքննիչ, տուժողները կդիմեն ՄԻԵԴ․ ՏԵՍԱՆՅՈՒԹ
Քաղաքականություն
10.05.2021 | 20:50
Վերաքննիչ քրեական դատարանը վարույթ է ընդունել Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի վերաբերյալ քրեական գործը: Հիշեցնենք, որ Գլխավոր դատախազությունը բողոքարկել է Մարտի 1-ի գործով ամբաստանյալների նկատմամբ Քրեական օրենսգրքի 300.1 հոդվածով քրեական հետապնդումը դադարացնելու և քրեական գործի վարույթն այս մասով կարճելու մասին առաջին ատյանի դատարանի որոշումը։
Ըստ էության, դատախազությունը Վերաքննիչ ատյանում վիճարկում է դատավոր Աննա Դանիբեկյանի կողմից ՍԴ որոշման հիման վրա Քոչարյանի և մյուսների նկատմամբ 300․1 հոդվածքով քրեական հետապնդումը դադարեցնելու որոշումը։
Գլխավոր դատախազ Արթուր Դավթյանը ԱԺ բարձր ամբիոնից օրերս հայտարարեց՝ հաստատ կարող է ասել, որ Մարտի 1-ի գործն ավարտված չէ։ Դատախազությունն էլ նշում է, որ ամբաստանյալներին մեղսագրված արարքները պետք է վերաորակվեն 309-րդ հոդվածով՝ պաշտոնեական լիազորություններն անցնելը։
Եթե անգամ Ռոբերտ Քոչարյանի և մյուսների մեղադրանքը վերաորակվի 309-րդ հոդվածով, այս դեպքում էլ վաղեմության ժամկետի խնդիր է առաջանում։
Ռոբերտ Քոչարյանի պաշտպան Արամ Վարդևանյանը Դատախազության կողմից Վերաքննիչ դատարան դիմելն ինքնանպատակ է համարում, իսկ մեղադրանքի վերաորակման մասին խոսելը՝ Քոչարյանի անմեղության կանխավարկածի խախտում։
Փաստաբան Սեդա Սաֆարյանը Factor.am-ի հետ զրույցում ասաց՝ եթե անգամ այնպես ստացվի, որ Վերաքննիչ դատարանն անփոփոխ թողնի առաջին ատյանի դատարանի որոշումը, միևնույն է, այս գործը չի փակվի, քանի որ իրենք դիմելու են ՄԻԵԴ։ Սաֆարյանը հիշեցնում է․ բացի այս գործից՝ ՀՔԾ-ում քննվում է նաև Մարտի 1-ի, այսպես կոչված, մայր գործը, որում ներառված են նաև տասը սպանությունները։
Սերժ Սարգսյանը չկարողացավ փակել Մարտի 1-ի գործը, իսկ Փաշինյանն այնպես փակեց, որ էլ բացել չի լինի․ նման տեսակետ է հայտնում Հայ ազգային կոնգրեսի փոխնախագահ Լևոն Զուրաբյանը։ «Հիմա Դուք ուզում եք ինձ համոզել, որ «Քաղաքացիական պայմանագիրը», Նիկոլ Փաշինյանի գլխավորությամբ, անում է ՍԴ ռեֆորմ, որի հետևանքով ՍԴ-ն 8-0 հաշվով փակում է Մարտի 1-ի էջը, դարձնում Քոչարյանին մաքուր, ոչնչով չարատավորված հերոս ու դա Փաշինյանի կամքից անկա՞խ է եղել»,- նշում է Զուրաբյանը։
Իշխող «Իմ քայլը» խմբակցության պատգամավոր Նիկոլայ Բաղդասարյանն էլ, հակադարձելով Զուրաբյանին, ասում է՝ իրենք ՍԴ-ում ռեֆորմներ չեն արել, Մարտի 1-ի գործն էլ չի փակվել։
Նշենք, որ 2018 թվականին Նիկոլ Փաշինյանը հայտարարում էր, թե Մարտի 1-ի գործն ամբողջությամբ բացահայտված է, իսկ երբ գործը մտավ փակուղի, նա պարզաբանեց․ բացահայտված ասելով՝ նկատի է ունեցել ճշմարտությունը։ Փաշինյանը նաև հավելեց՝ իրենք ոչ թե դատաստան, այլ արդարադատություն են ուզում, և դատական պրոցեսներին չեն միջամտի։
Հավելենք, որ այժմ դատարանը շարունակում է քննել Ռոբերտ Քոչարյանի և Արմեն Գևորգյանի վերաբերյալ քրեական գործը, որն առնչվում է առանձապես խոշոր չափերով կաշառք ստանալուն։
Մանրամասները՝ տեսանյութում։
Լիլիթ Շաբոյան
