17.12.2025 | 14:55
Մենք հաշվի ենք առնում ադրբեջանական և հայկական կողմերի շահերը. Կոբախիձե
Էդմոն Մարուքյանը կրկին ընտրվեց «Լուսավոր Հայաստան» կուսակցության նախագահ
17.02.2018 | 15:50
«Լուսավոր Հայաստան» կուսակցության այսօր տեղի ունեցած երկրորդ համագումարում կրկին միաձայն կուսակցության նախագահ ընտրվեց Էդմոն Մարուքյանը: Կուսակցությունն ընտրեց նաև կառավարման խորհրդի 15 անդամներից բաղկացած կազմ, ինչպես նաև ստեղծվեց նոր մարմին՝ քաղաքական խորհուրդ: Համագումարի ընթացքում կուսակցության նախագահ Էդմոն Մարուքյանը հանդես եկավ ելույթով՝ ներկայացնելով կուսակցության անցած ճանապարհը, արձանագրած հաջողություններն ու առաջիկա անելիքները:
«Լուսավոր Հայաստանն այս կարճ ժամանակահատվածում անցել է երեք խոշոր ընտրական գործընթացների միջով: Մասնակցել է առաջին անգամ Հայաստանում համամասնական ընտրակարգով անցկացված տեղական ընտրություններին: Հետո ստեղծվեց «Ելք» կուսակցությունների դաշինքը, որը խորհրդարանական ընտրություններից հետո դարձավ խորհրդարանական երրորդ ուժը: ԱԺ ընտրություններից անմիջապես հետո մասնակցեցինք Երևանի ավագանու ընտրություններին, որի արդյունքներով էլ զբաղեցրեցինք երկրորդ տեղը»,- հայտարարեց Մարուքյանը՝ իրենց դաշինքի քաղաքական ճանապարհը բնորոշելով լատինական ասույթով. «Փշերի միջով դեպի աստղեր»:
Համագումարի ընթացքում ելույթներ ունեցավ նաև «Ելք» խմբակցության ղեկավար Նիկոլ Փաշինյանը, «Հանրապետություն» կուսակցության նախագահ Արամ Սարգսյանը, ինչպես նաև «Լուսավոր Հայաստան» կուսակցության մի շարք անդամներ: «Երբեք ու երբեք լուսավորական ոչ մի գործունեություն կոմֆորտի գործունեություն չի եղել: Դա եղել է զրկանքների, հետապնդումների և առժամանակ չհասկացման և օտարման ճանապարհ, որը պետք է անցնի ցանկացած մարդ, ով իրեն համարում է լուսավորության մարտիկ: «Ելք» դաշինքի հիմքում հենց այս գործունեությունն է դրված»,- իր ելույթում ընդգծեց Նիկոլ Փաշինյանը:
«Հանրապետություն» կուսակցության նախագահ Արամ Սարգսյանն էլ իր հերթին շեշտեց, որ դաշինքին շատ լուրջ փորձություն է սպասվում: «Էս նոր փորձության պարագայում որևէ մեկը չի կարող ասել, թե ինչ հանգամանքներում հանրությունը փողոց դուրս կգա: Ակնհայտ է, որ էս իշխանությունը փորձելու է վերարտադրվել, ինչը շատ վատ անդրադարձ է ունենալու մեր լուսավոր հայրենիք ունենալու հեռանկարի վրա»,- հավելեց Արամ Սարգսյանը: Նկատենք, որ համագումարին բացի «Ելք» դաշինքի մաս կազմող կուսակցություններից որևէ այլ քաղաքական ուժ ներկա չէր:
Շողիկ Գալստյան
