Արմեն Գևորգյանը դատի է տվել ԱԺ պատգամավոր Արուսյակ Ջուլհակյանին և փաստաբան Մուշեղ Շուշանյանին ու շահել

Երևանի ընդհանուր իրավասության դատարանը, դատավոր Արթուր Ստեփանյանի նախագահությամբ, բավարարել է ՀՀ նախկին փոխվարչապետ Արմեն Գևորգյանի հայցն ընդդեմ ՀՀ ԱԺ պատգամավոր Արուսյակ Ջուլհակյանի և փաստաբան Մուշեղ Շուշանյանի։

Դատարանի որոշման մեջ ասվում է՝ Արմեն Անդրանիկի Գևորգյանի հայցն ընդդեմ Մուշեղ Սամվելի Շուշանյանի, Արուսյակ Թովմասի Ջուլհակյանի՝ վիրավորանք և զրպարտություն համարվող տեղեկությունները հերքելու, հրապարակային ներողություն խնդրելու և փոխհատուցում պահանջելու, անմեղության կանխավարկածի խախտումն արձանագրելու, հրապարակային ներողություն խնդրելու և փոխհատուցման պահանջների մասին, բավարարել մասնակիորեն: Դատարանը որոշել է պարտավորեցնել պատասխանող Մուշեղ Շուշանյանին մեկշաբաթյա ժամկետում հերքել նախկինում արված արտահայտությունը, թե «հստակ տեղեկություններ կան, որ հենց Ռոբերտ Քոչարյանի աշխատակազմի ղեկավարն է ներգրավված եղել, մասնակցել կոռուպցիոն գործընթացներին»։

Իսկ պատասխանող Արուսյակ Ջուլհակյանին դատարանը պարտավորեցրել է հերքել 07.08.2019 թվականին արված արտահայությունը, երբ կոռուպցիոն հանցագործությունների մասին խոսելիս Ջուլհակյանն ասել է. «Դրանից մեկ տարի անց կառավարությունը փոխում է իր որոշումը, կառավարության գլուխն էլ Անդրանիկ Մարգարյանն էր, հիմա տեսեք, թե քանի ֆիգուր է մասնակցում այս ամեն ինչին: Այս ամեն ինչն իրականացվել է նախագահի աշխատակազմի ղեկավար Արմեն Գեւորգյանի կոորդինացիայի ներքո: Կարծում եմ՝ այստեղ բացահայտելու շատ բան չկա: Ամեն ինչ շատ պարզ է և հստակ է»:

Ընդհանուր առմամբ, դատարանը որոշել է երկու կողմերից որպես զրպարտության արդյունքում հայցվորի պատվին և արժանապատվությանը պատճառված ոչ նյութական վնասի փոխհատուցում գանձել 2․800․000 ՀՀ դրամ։ Վճիռը կամովին չկատարելու դեպքում այն կկատարվի Հարկադիր կատարումն ապահովող ծառայության միջոցով՝ պարտապանի հաշվին:

Լիլիթ Շաբոյան