Մովսես Հակոբյանի առանձնատան կառուցմանը Արցախի կառավարությունը ֆինանսներ չի հատկացրել. ԱՀ դատախազություն

Ըստ դատախազության իրականացրած ստուգումների՝ Արցախի Հանրապետության Պաշտպանության բանակի նախկին հրամանատար Մովսես Հակոբյանին պատկանող բնակելի առանձնատան կառուցման, կատարած ծախսերի հատուցման կամ դրա հետ կապված որևէ այլ նպատակով Արցախի կառավարության կողմից ֆինանսական միջոցներ երբևէ չեն հատկացվել: Այս մասին տեղեկացնում են Արցախի Հանրապետության գլխավոր դատախազության հանրային կապերի բաժնից:

Տեղեկատվության համաձայն՝ Արցախի Հանրապետության դատախազությանը 2021 թվականի մարտի 29-ին դիմում էր ներկայացվել լայն տարածում ստացած այն տեղեկության վերաբերյալ, ըստ որի՝ Պաշտպանության բանակի նախկին հրամանատար Մովսես Հակոբյանի` Ստեփանակերտ քաղաքում տեղակայված առանձնատունը՝ Արցախի Հանրապետության կառավարության որոշմամբ, սեփականատիրոջից գնվել և նվիրատվության կարգով նվիրաբերվել է Մովսես Հակոբյանին:

Դիմումով՝ դատախազությանը միջնորդություն է ներկայացվել՝ հիշյալ տեղեկության` իրականության համապատասխանությունն ու հիշատակվող գործարքների իրավաչափությունը պարզելու համար:

Պետության գույքային շահերի պաշտպանության սահմանադրական լիազորության շրջանակում դատախազության կողմից իրականացված ստուգման արդյունքներով պարզվել է, որ Ստեփանակերտի քաղաքապետի 2005թ. որոշմամբ՝ ԱՀ պաշտպանության բանակի նախկին հրամանատար Մ.Հակոբյանին Ստեփանակերտ քաղաքի Տ.Մեծ փողոցի մոտակայքում հատկացվել էր հողատարածք` անհատական բնակելի տուն կառուցելու համար:

Ստեփանակերտի քաղաքապետարանի կողմից 2006 թ. Մ.Հակոբյանին տրվել էր շինարարության թույլտվություն՝ անհատական բնակելի տան կառուցման համար, թույլտվության գործողության ժամկետը սահմանվել էր մինչև 2009 թվականը:

ԼՂՀ անշարժ գույքի կադաստրի պետական կոմիտեի Ստեփանակերտի տարածքային ստորաբաժանումը, Մ.Հակոբյանը դիմումի հիման վրա՝ հիշյալ հողամասում կառուցված առանձնատան նկատմամբ 2008 թվականին գրանցել է նրա սեփականության իրավունքը:

«Ինչպես դիտվում է կադաստրային գործում ներառված փաստաթղթերից, Մ.Հակոբյանին պատկանող բնակելի առանձնատան նկատմամբ սեփականության իրավունքի փոփոխություն երբևէ տեղի չի ունեցել.այն ԱՀ կառավարության կամ այլ սուբյեկտի կողմից չի գնվել և օտարման առարկա չի եղել»,-նշել են դատախազությունից՝ընդգծելով, որ Արցախի Հանրապետության ֆինանսների նախարարությանն ու Արցախի ներդրումային հիմնադրամին արված հարցումների պատասխաններից հետևում է, որ հիշյալ առանձնատան կառուցման, կատարած ծախսերի հատուցման կամ դրա հետ կապված որևէ այլ նպատակով ֆինանսական միջոցներ Մ.Հակոբյանին երբևէ չեն հատկացվել: