Հասարակություն
26.04.2021 | 18:38
Մեղրիի մաքսատունը շարունակում է իր աշխատանքը, իսկ Ագարակի մաքսակետ պահեստը զրկվել է լիցենզիայից և այս պահին չի գործում։ Այս մասին Factor.am-ին տեղեկացրեց ՀՀ ՊԵԿ տեղեկատվության և հասարակայնության հետ կապերի բաժնի պետ Լուսինե Մկրտչյանը։
Նրա խոսքով՝ պահեստում հայտնաբերվել են բավականին լուրջ խախտումներ։
«Դեռ մեկ ամիս առաջ ՊԵԿ նախագահի հանձնարարականով մասնագետներ են գործուղվել և ստուգումներ իրականացրել: Դա պարբերաբար կատարվող աշխատանք է, և հերթական անգամ մասնագետները ստուգումներ իրականացնելու արդյունքում Ագարակում հայտնաբերել են բավական կոպիտ խախտումներ, որոնք թույլ չեն տալիս պահեստի շահագործումն այդ վիճակով, այդ պատճառով դադարեցվել է լիցենզիան։ Բայց, այնուամենայնիվ, պահեստի՝ այս պահին չգործելը չի նշանակում, որ բեռները մնալու են սահմանին կամ տեղաշարժ չի լինելու։ Գոյություն ունեն բազմաթիվ այլ պահեստներ, որտեղ կարող են գալ, բեռնաթափվել և ստուգում իրականացնել»,- նշեց ՊԵԿ խոսնակը։
Լուսինե Մկրտչյանը հերքեց տեղեկությունները, ըստ որոնց՝ հայ–իրանական սահմանին՝ Մեղրիի անցակետի մոտ այս պահին Հայաստանից Իրան ուղևորվող բեռնատարերի խոշոր կուտակում կա։
«Բացարձակ կուտակում չկա, մաքսատունը շարունակում է իր աշխատանքը»,- վստահեցրեց նա։
Անժելա Պողոսյան
