07.08.2026 | 23:37
Անձրև, ամպրոպ և ջերմաստիճանի նվազում. առաջիկա օրերի եղանակի կանխատեսումը
Թուրքիայից զգուշացնում են՝ առաջիկայում տարբեր ձևաչափերով կպատասխանեն Բայդենի կողմից Հայոց ցեղասպանության ճանաչմանը
Քաղաքականություն
26.04.2021 | 18:23
ԱՄՆ նախագահ Ջո Բայդենի հայտարարությունը, որ Օսմանյան կայսրությունում հայերի կոտորածները ցեղասպանություն են համարվում, «պարզապես վրդովեցուցիչ» են, և Թուրքիան առաջիկա ամիսներին կպատասխանի։ Այս մասին ասել է Թուրքիայի նախագահի մամուլի խոսնակը։
«Առաջիկա օրերին ու ամիսներին կլինի տարբեր ձևերի, տեսակի ու աստիճանի արձագանք»,- Reuters-ի հետ հարցազրույցում հայտարարել է Էրդողանի խոսնակ Իբրահիմ Քալընը։
Նա չի նշել, սակայն, Անկարան կսահմանափակի՞ ԱՄՆ-ի մուտքն Ինջիրլիքի ռազմաբազա, որն օգտագործվել է Սիրիայում ու Իրաքում «Իսլամական պետության» դեմ պայքարում միջազգային կոալիցիայի աջակցման համար։
«Տեղում ու ժամանակին մենք կշարունակենք արձագանքել այս անարդար հայտարարությանը»,- ասել է Քալընը։
Բացի այդ, սպասվում է, որ այս շաբաթ Թուրքիայի խորհրդարանը հայտարարություն է անելու։ Ըստ վերլուծաբանների՝ պատգամավորները կարող են հռետորական կերպով պատասխանել Բայդենին՝ եվրոպացի վերաբնակների կողմից բնիկ ամերիկացիների հանդեպ վերաբերմունքը «ցեղասպանություն» որակելով։
Թուրքիայի նախագահի խոսնակը նաև հայտնել է, որ Թուրքիային ԱՄՆ պաշտոնյաներն ասել են՝ հռչակումը որևէ հիմք չէ հատուցման իրավական պահանջների համար։ Այնուամենայիվ, Էրդողանն ԱՄՆ նախագահի հետ հեռախոսազրույցում ասել է, որ «մեծ սխալ է» այդ հայտարարությունը շարունակելը։
«Ամենը մեկ բառով ներկայացնել ու փորձել ցույց տալ, որ թուրքերը ներգրավված են, մեր Օսմանյան նախնիները ներգրավված են ցեղասպան գործողություններում, պարզապես վրդովեցուցիչ է։ Դա պատմական փաստերով չի ապացուցվում»,-եզրափակել է Քալընը։
Էմմա Չոբանյան
