Համաշխարհային մարդասիրական «Ավրորա» մրցանակի այս տարվա հավակնորդներն արդեն հայտնի են։ Մրցանակի Ընտրող հանձնաժողովի նախագահ Լորդ Արա Դարզին քիչ առաջ հայտարարեց 585 հայտից ընտրված մարդասեր ակտիվիստների անունները։
Նրանք են՝
• Գրեգուար Ահոնգբոնոն (Կոտ դ’Իվուար). «Սբ Կամիլ» ընկերակցության հիմնադիր, որն օգնում է Արևմտյան Աֆրիկայում հոգեկան հիվանդությամբ տառապող մարդկանց և փորձում է վերջ տալ նրանց շղթայակապ պահելու` տեղական անմարդկային սովորությանը: Գրեգուար Ահոնգբոնոնն առաջադրել է երեք կազմակերպություն, որոնք խթանում են միջազգային համերաշխությունը և աջակցում են մտավոր հաշմանդամություն ու հոգեկան հիվանդություններ ունեցող անձանց։ Դրանք են «Միջազգային զարգացման կրթության՝ Լանոդիերի տարածաշրջանային կոմիտեն» (ԿՐԵԴԻԼ), «Լ’Արշ Կանադա» հիմնադրամը և «Սբ Կամիլ» ընկերակցությունը:
• Ջուլիեն Լուսենգե (Կոնգոյի Դեմոկրատական Հանրապետություն). մարդու իրավունքների պաշտպան, «Կանանց համերաշխություն՝ հանուն ներառական խաղաղության և զարգացման» (SOFEPADI) կազմակերպության և Կոնգոյացի կանանց հիմնադրամի (FFC) համահիմնադիր, որը տարիներ ի վեր օգնում է պատերազմի ընթացքում սեռական բռնության ենթարկվածներին։ Տիկին Լուսենգեն առաջադրել է երեք կազմակերպություն, որոնք աջակցում են կանանց կազմակերպություններին, զորացնում են գենդերային հիմքով բռնության զոհերին և օգնում ներքին տեղահանված անձանց՝ վերաինտեգրվելու իրենց համայնքներ։ Դրանք են Կոնգոյացի կանանց հիմնադրամը, Կոնգոյի համերաշխության լիգան և «Մայրերի ընկերություն՝ հանուն զարգացման և խաղաղության» կազմակերպությունը:
• Ռուբի Ալբա Կաստանյո (Կոլումբիա). իրավապաշտպան և ASOCATDAME-ի (Գյուղացիների, գյուղական աշխատողների և շրջակա միջավայրի պաշտպանների Մետայի ասոցիացիա) հիմնադիր, որն աշխատում է պաշտպանել հազարավոր կոլումբիացի գյուղացիների իրավունքները, որոնք ենթարկվում են հետապնդումների, հարկադիր տեղահանումների և անհետացման։ Տիկին Կաստանյոն առաջադրել է հետևյալ երեք կազմակերպությունները, որոնք պաշտպանում են Կոլումբիայի գյուղացիական և աղքատ համայնքների իրավունքները. Գյուղացիների, գյուղական աշխատողների և շրջակա միջավայրի պաշտպանների Մետայի ասոցիացիա (ASOCATDAME), «Նորման Պերես Բեյո» կլարետյան կորպորացիա (CCNPB) և Գյուղատնտեսական միությունների ազգային դաշնություն (FENSUAGRO):
• Աշվաք Մոհարամ (Եմեն). բժիշկ, որը կենսապահպան աջակցություն է ցուցաբերում Եմենի Հոդեյդա նահանգի սովյալ բնակչությանը, որը հայտնվել է հակամարտության ու շրջափակման հետևանքով գոյացած ճգնաժամի մեջ: Բժիշկ Մոհարամն առաջադրել է երկու կազմակերպություն, որոնք պաշտպանում են երեխաների ապագան և անվճար առողջապահական ծառայություններ մատուցում Եմենում ընթացիկ հակամարտությունից տուժածներին. դրանք են «Փրկեք Եմենի երեխաներին» և «Բժիշկներ առանց սահմանների» (Եմեն) կազմակերպությունները:
• Փոլ Ֆարմեր (ԱՄՆ). բժիշկ-մարդաբան, Հարվարդի բժշկական դպրոցի դասախոս, «Առողջապահական գործընկերներ» (PIH) միջազգային շահույթ չհետապնդող կազմակերպության համահիմնադիր և գլխավոր ռազմավար, որը ժամանակակից բժշկագիտության օգուտները հասցնում է նրանց, ովքեր ամենից շատ ունեն դրա կարիքը: Փոլ Ֆարմերը առաջադրել է երկու կազմակերպություն, որոնք առողջապահական ծառայություններ են մատուցում աշխարհի ամենաաղքատ համայնքներին և ստեղծում են սոցիալական բժշկություն ուսուցանողների ու պրակտիկ գործունեությամբ զբաղվող մասնագետների համաշխարհային շարժում։ Դրանք են «Առողջապահական գործընկերներ» և «Հավասար առողջություն» կազմակերպությունները։
«Ինձ համար մեծ պատիվ է ունենալ հնարավորություն՝ ճանաչման արժանացնելու ամբողջ աշխարհից ընտրված այս ականավոր կանանց ու տղամարդկանց: 2021 թ. «Ավրորայի» հերոսներն անհատներ են, որոնք իսկապես հավատում են մարդու հիմնարար իրավունքներին և իրենց կյանքը նվիրել են անբարենպաստ վայրերում գտնվող մարդկանց օգնելու գործին: Նրանք ճանաչման են արժանանում նաև այն հսկայական ազդեցության համար, որ նույնիսկ մեկ անհատը կարող է գործել՝ օգնելով հազարավոր մարդկանց և որ ամենակարևորն է, միաժամանակ, ոգեշնչել միլիոնավոր մարդկանց», – ասաց «Ավրորա» մրցանակի ընտրող հանձնաժողովի նախագահ Լորդ Արա Դարզին:
Հավելենք՝ «Ավրորայի» հերոսներից մեկը կդառնա 2021 թ. «Ավրորա» մրցանակի դափնեկիր և հնարավորություն կստանա շարունակելու նվիրատվության շղթան՝ մեկ միլիոն դոլար մրցանակը բաշխելով այն կազմակերպությունների միջև, որոնք օգնում են կարիքավորներին։
Հիշեցնենք՝ նախորդ տարիներին «Ավրորա» մրցանակին են արժանացել ամերիկացի վիրաբույժ և միսիոներ Թոմ Քաթինան, բուրունդեցի ակտիվիստ Մարգարիտ Բարանկիցեն, ռոհինջա իրավաբան ու մարդու իրավունքների պաշտպան Չո Լա Աունը, եզդի ակտիվիստ Միրզա Դինային, որոնք, վտանգելով իրենց կյանքը, փրկել են հարյուր հազարավորներին։
