11.03.2026 | 18:54
Ադրբեջանի դերը տարածաշրջանում այսօր ավելի կարևոր է, քան երբևէ. Անտոնիո Կոշտա
Կարևոր է, որ ԵԽԽՎ-ում եվրոպացիներն են խոսում հայ գերիների մասին, բայց ակնկալիքներում զգույշ լինենք․ ՏԵՍԱՆՅՈՒԹ
Քաղաքականություն
21.04.2021 | 16:48
Ադրբեջանում պահվող հայ գերիների վերադարձի շուրջ ԵԽԽՎ-ում տեղի ունեցած քննարկման մասին Factor TV-ի եթերում զրուցել ենք ԱԺ «Իմ քայլը» խմբակցության պատգամավոր, ԵԽԽՎ-ում Հայաստանի պատվիրակության անդամ Սոս Ավետիսյանի հետ
–ԵԽԽՎ-ում գերիների հարցով քննարկմանը ի՞նչ նախնական գնահատական կտաք։
-Մեր ռազմագերիների, գերիների և այլ պահվող անձանց վերաբերյալ քննարկումը շատ կարևոր է ԵԽԽՎ-ում, և մենք կարողացանք այն օրակարգային հարց սարքել։ Բոլոր պատվիրակությունները, բոլոր հիմնական քաղաքական խմբերն աջակցում էին այն բաց հարցին, որ հայ ռազմագերիները և այլ պահվող անձինք պետք է օր առաջ վերադարձվեն Հայաստան։
–Եվրոպացի պատգամավորները նույնպես միացել էին։ Այնպես չէ, որ միայն հայ պատգամավորներն էին խոսում այդ մասին։ Ի՞նչ կարելի է ակնկալել այս քննարկումից։
-Ակնկալիքների մասով մենք պետք է բավականին զգուշավոր լինենք, և շատ կարևոր է, իհարկե, որ հենց եվրոպացի պատգամավորներն են այս հարցերի շուրջ խոսում։ Սա ի՞նչ է նշանակում․ այն միջազգային ճնշումը, որ այս հարցի շուրջ մենք կարողանում ենք բանեցնել և ավելացնել Ադրբեջանի նկատմամբ, պետք է անընդհատ պահվի։ Ես չեմ կարող ասել, թե ինչ կլինի մեկ կամ երկու քննարկումից անմիջապես հետո։ Բայց սա, երևի թե, խորհրդարանական վեհաժողովներում եղած ամենակարևոր քննարկումներից մեկն է։ Եվ ամենաբարձր մակարդակով է քննարկվել։
–Ռուսական կողմը քվեարկել է «դեմ» կամ «ձեռնպահ» գերիների հարցն օրակարգ մտցնելուն։ Դուք արդյո՞ք խոսել եք ռուս պատգամավորների հետ, թե ինչ է եղել։ Նրանք ի՞նչ պարզաբանումներ ունեն այս հարցում։
-Այո՛, մեր պատվիրակության ղեկավարը խոսել է ռուսական կողմի ներկայացուցչի հետ։ Նրանք բացատրել են, որ տեղի է ունեցել տեխնիկական խնդիր։ Այն հայտարարությունը, որ արել են, տեխնիկականին է վերաբերում, բայց, ըստ էության, նրանք նշել են, որ ունեն կոմունիկացիայի խնդիր։ Դրա պատճառով են իրենք քվեարկել «ձեռնպահ» կամ «դեմ»։
Հարցազրույցն ամբողջությամբ՝ տեսանյութում։
Գարիկ Հարությունյան
