Հասարակություն
19.04.2021 | 13:47Թե բանակն ինչ ֆորմատով կլինի, ինչ կարգավորումներ կլինի, կտեսնենք. վստահ կարող եմ ասել մի բան, որ բանակի մեջքը պետք է շատ արագ ուղղվի, մենք պետք է ունենանք տարածաշրջանում ամենամարտունակ բանակը, և մեր նշաձողը այլևս Ադրբեջանը չպետք է լինի, այլ տարածաշրջանային այլ երկրներ, նաև Թուրքիան: Այս մասին այսօր ԱԺ-ում լրագրողների հետ զրույցում ասաց ԱԺ «Իմ քայլը» խմբակցության պատգամավոր Արմեն Խաչատրյանը:
Անդրադառնալով Թուրքիայի հետ Հայաստանի հարաբերություններին, պատգամավորը նշեց, որ որևէ մեկը չի խոսել Թուրքիայի հետ բարեկամության մասին. «Կեղծ օրակարգը՝ Թուրքիան բարեկամ է, թե թշնամի, եկեք թողնենք մի կողմ: Բոլորս էլ գիտենք, որ Թուրքիան ոչ բարյացկամ վերաբերմունք ունի Հայաստանի և հայ ժողովրդի նկատմամբ: Այո, մենք դարերով թշնամական հարաբերություններ ունենք Թուրքիայի հետ, սակայն ինչ պետք է անել թշնամու հետ: Թշնամուն պետք է կամ դարձնես կառավարելի, կամ ոչնչացնես: Թշնամուն պետք է հաղթես տարբեր բնագավառներում՝ և՛ տնտեսական, և՛ ռազմական: Այս պատերազմի ընթացքում մենք հնարավորինս ոչնչացրել ենք թշնամուն, նրանք շատ մեծ կորուստներ են ունեցել և թեև ուժերը եղել են ակնհայտ անհամաչափ, սակայն թշնամին զգալի և էական կորուստներ են ունեցել, որոնք թաքցնում են»:
Խաչատարյանը նաև ընդգծեց, որ Հայաստանի բանակը պետք է լինի առավելագույնս պրոֆեսիոնալ և միանշանակ է, որ պետք է վերանայվեն զինծառայության նորմերը և զինծառայության սկզբունքները. «Մենք չենք կարող թույլ տալ, որպեսզի մեր բանակը պարապուրդի մատնվի, մեր զինվորը ծառայության ժամանակ պետք է ազատ ժամանակ չունենա և ամբողջ ծառայությունը անցկացնի ուսուցման մեջ»:
Մանրամասները՝ տեսանյութում:
