Ամբաստանյալը հայտնեց, թե իրեն ստիպել են ցուցմունք տալ Լոռեցյանի դեմ. ՏԵՍԱՆՅՈՒԹ

Երևանի ընդհանուր իրավասության դատարանում, դատավոր Արտուշ Գաբրիելյանի նախագահությամբ, այսօր շարունակվում է ԿԳՄՍ նախկին փոխնախարար Գևորգ Լոռեցյանի և մյուսների գործով դատական նիստը:

Նիստի մեկնարկին Լոռեցյանի պաշտպանը միջնորդեց փոխել ապացույցների հետազոտման կարգը և գրավոր ապացույցներից առաջ լսել ամբաստանյալներին: Առաջինը ցուցմունք տալու ցանկություն ունի գործով ամբաստանյալ Էդուարդ Հովհաննիսյանը: Մեղադրող դատախազ Դավիթ Սարգսյանը առարկեց միջնորդության դեմ՝ նշելով, որ տպավորություն է, թե պաշտպանական կողմը ամեն կերպ խուսափում է ապացույցների հետազոտմանն անցնելուց:

Դատախազը, այնուամենայնիվ, չառարկեց, որպեսզի հարցաքննվի Էդուարդ Հովհաննիսյանը: Դատարանը կողմերին լսելով, որոշեց մերժել միջնորդությունը՝ ապացույցների հետազոտման կարգը փոխարինելու մասին: Դատարանը ընթերցեց Հովհաննիսյանի միջնորդությունը, որով ամբաստանյալը խնդրում էր Գևորգ Լոռեցյանի խափանման միջոցը փոխել:

Ամբաստանյալ Հովհաննիսյանը նշել էր, թե ինքը խաբել է, երբ ասել է, թե իրեն Լոռեցյանը գումար է տվել կամ պահանջել: Ամբաստանյալը նշել էր, թե իրեն ստիպել են Լոռեցյանի դեմ ցուցմունք տալ, ասելով, որ այդ դեպքում իրեն բաց կթողնեն: Դատավորը նշեց, որ սա այն ամենն է ինչ ամբաստանյալը ցանկանում էր հայտնել դատարանին:

Մեղադրողն ասաց, որ սա ոչ թե միջնորդություն է, այլ դիմում, և որ այդ տվյալները հերքվել են և ապացույցները հետազոտելիս դրանք պարզ կդառնան:

Ըստ մեղադրական եզրակացության՝ Գևորգ Լոռեցյանը 2019թ․ հունիսի 4-ից լինելով գործադիր իշխանության ղեկավար պաշտոնատար անձ, «Լուառ» և «Էլիտ Սպրտ» առևտրային կազմակերպությունների սեփականատեր և գործադիր տնօրեն Հրաչիկ Քանանյանից պահանջել է 2 միլիոն ՀՀ դրամ կաշառք իր կողմից ընդհանուր հովանավորչության, վերջինիս ներկայացրած առևտրային կազմակերպությունների կողմից ԿԳՄՍ նախարարության կազմակերպած գնման գործընթացներին մասնակցության ու դրանցում հաղթելու դեպքում մատակարարվող ապրանքներն ընդունելիս խոչընդոտներ չստեղծելու և հնարավոր խնդիրներից զերծ պահելու համար։

Լիլիթ Շաբոյան