18.11.2024 | 23:35
ԵՄ-ն ծրագրում է «քաղաքական առաքելություն» ուղարկել Վրաստան. Բորել
Մեկ բուհ, մեկ մասնագիտություն․ նոր սկզբունքը քաոս ու բողոքի նոր ալիքի կբերի՞ դիմորդների շրջանում․ ՏԵՍԱՆՅՈՒԹ
Հասարակություն
10.04.2021 | 17:50
Արդեն հայտնի է, որ հայաստանյան բուհերում փոփոխվել է ընդունելության կարգը․ այս տարի կկիրառվի նոր սկզբունք, ըստ որի՝ դիմորդներն ընդունելության հայտագրման առաջին փուլում կընտրեն մեկ բուհ, մեկ մասնագիտություն: Կառավարությունն ապրիլի 1-ի նիստում հաստատել է որոշումը:
Դիմորդները կհայտագրեն նախընտրելի մասնագիտությունը մեկ բուհում՝ դրա անվճար և վճարովի տարբերակներով։ Գնահատման և թեստավորման կենտրոնի փոխտնօրեն Կարո Նասիբյանը Factor.am-ի հետ զրույցում շեշտում է՝ այս փոփոխությամբ նպատակ ունեն խթանելու, որպեսզի դիմորդները հստակ կողմնորոշվեն մասնագիտության հարցում։ Դիտարկմանը, թե հնարավոր է՝ նախորդ տարվա քաոտիկ իրավիճակը կրկնվի և դիմորդներն ու նրանց ծնողները դժգոհեն քննությունների արդյունքներից ու կրթական գերատեսչության մոտեցումից, մեր զրուցակիցը պատասխանում է, որ ոչ։
Կարո Նասիբյանը հիշեցնում է՝ նախորդ տարի շուրջ 200 դիմորդ է դուրս մնացել մրցակցությունից․ նրանց մի մասը չի ցանկացել նախընտրելի մասնագիտությունից զատ՝ այլ մասնագիտություն ընտրել, մյուս մասն էլ պարզապես ցածր միավորներ է հավաքել։ Մեր զրուցակցի հավաստմամբ՝ նախորդ տարվա համեմատ՝ պայմանները նույնիսկ բարելավվել են։
Սուսաննա Գևորգյանն այս տարի պետք է դիմի բուհ և այն կարծիքին է, որ փոփոխությունը մի կողմից կոնկրետացնում է դիմորդի նպատակը, մյուս կողմից, սակայն, սահմանափակում նրա հնարավորությունները։ Սուսաննան հույս է հայտնում, որ դիմորդների շրջանում նախորդ տարվա նման մեծ աղմուկ չի բարձրանա։
«Էրազմուս+» ծրագրի բարձրագույն կրթության բարեփոխումների փորձագետ Քրիստինե Ծատուրյանը, սակայն, այն համոզման է, որ այս տարի էլ բողոքներից ու աղմուկից խուսափել չի լինի։ Նրա կարծիքով՝ չեն գնահատվել հնարավոր ռիսկերը և փոփոխությունն ի շահ դիմորդի չի արվել։
Փորձագետը ևս ինչ-որ չափով ընկալում է մեկ մասնագիտություն ընտրելու սկզբունքը, բայց մեկ բուհ ընտրելու մոտեցումը՝ ոչ։ Նա շեշտում է՝ այս փոփոխությամբ սահմանափակվելու է նաև մագիստրատուրայում այլընտրանքային մասնագիտություն ձեռք բերելու հնարավորությունը։ Նա խոսում է նաև այն հոգեբանական հսկայական բեռի մասին, որը ծանրանալու է շրջանավարտների ուսերին։
Հավելենք, որ առաջին և երկրորդ փուլերն ավարտվելուց հետո հուլիսի 18-ին սկսվելու է լրացուցիչ թափուր տեղերի համար հայտագրում: Վերջին մրցույթի արդյունքները հրապարակվելու են հուլիսի 30-ին:
Մանրամասները՝ տեսանյութում։
Աննա Բաբաջանյան
