Տնտեսություն
08.04.2021 | 13:29
Արցախում բուսաբուծության համալի զարգացման նպատակով մեկնարկած ծրագրի համաձայն՝ 100 տոկոսի չափով փոխհատուցվելու են գարնանացան մշակաբույսերի՝ 1 հա-ի համար սահմանված համապատասխան քանակությամբ սերմերի արժեքները: Այս մասին «Արցախպրես»-ի հետ զրույցում տեղեկացրել է Արցախի Հանրապետության էկոնոմիկայի և գյուղատնտեսության փոխնախարար Վիլեն Ավետիսյանը:
«Միաժամանակ, գարնանացան մշակաբույսերի սերմերի ցանքատարածքներից ստացված բերքի 1 կիլոգրամի համար նախատեսված է լրավճար՝ 10-50 դրամի չափով»,- ավելացրեց Ավետիսյանը:
Ի տարբերություն նախորդ տարվա՝ այս տարի բանջարաբոստանային մշակաբույսերի ցանքսի 1հա-ի դիմաց կտրամադրվի 300 հազար դրամ միանվագ գումար՝ նվազագույնը սկսած՝ 0,5 հա-1 հա մակերեսով ցանքատարածքի դեպքում:
«Այս տարի բանջարաբոստանային մշակաբույսերի մշակության համար տրամադրվող 300 հազար դրամ աջակցության ծրագրում ընդգրկվել են նաև ձմերուկն ու սեխը: Նախկինում, հիմնականում Ակնայում և Քաշաթաղի շրջանի հարավային թևում մշակվում էր մոտ 450 հեկտար ձմերուկ, որից ստացված բերքը հիմնականում արտահանվում էր: Այս տարի ձմերուկի մշակության նպատակով պետական աջակցությունից օգտվելու համար առայժմ մոտ 30 հեկտարի չափով է հայտ ներկայացվել,որը չի կարող բավարարել ներքին պահանջարկը»,- ընդգծեց փոխնախարարը՝ հույս հայտնելով, որ մինչև վեգետացիոն ժամանակահատվածը բավարար չափով հայտեր կներկայացվեն նաև ձմերուկի մշակության համար նախատեսվող պետական աջակցությունից օգտվելու համար:
Բուսաբուծության համալիր ծրագրով աջակցություն է տրամադրվելու նաև նվազագույնը՝ սկսած 100 քմ մակերես ունեցող գործող ջեռուցվող ջերմատներին՝ 1 քմ դիմաց՝ 600 դրամի չափով: Չջեռուցվող ջերմատան 1 հա-ի դիմաց աջակցություն կտրամադրվի 1 քմ դիմաց՝ 300 դրամի չափով:
«Բացի այդ, նորարական տեխնոլոգիաներով հագեցած ջերմոցների ներդրումային ծրագրով՝ պետության կողմից կսուբսիդավորվի նվազագույնը՝ 2500 քմ մակերեսով ջերմոցի ծախսերի 50 տոկոսի արժեքը, սակայն ոչ ավելի, քան՝ 50 մլն դրամ՝ 1 ջերմոցի դեպքում»,- ասաց Ավետիսյանը:
Փոխնախարարի հաղորդմամբ՝ կրկնապատկվել է ծխախոտի մշակությունից ստացված բերքի իրացման (մթերման) դիմաց տրամադրվող լրավճարը՝ 1 կգ-ի դիմաց հասնելով 20 դրամի (նախորդ տարվա 10 դրամի փոխարեն): Նորատունկ այգիների մակերեսի ընդլայնումը խթանելու նպատակով կփոխհատուցվեն տնկիների արժեքները՝ 1 տնկիի դիմաց առավելագույնը 1000 դրամի չափով:
«Այս դեպքում պատրադիր պայմաններից է նվազագագույնը ՝0,5 հա ,իսկ առավելագույնը՝ 10 համակերեսով պտղատու այգի հիմնելը: Ծրագրում ընդգրկված են Հանրապետությունում մշակվող գ բոլոր պտղատեսակները»,- նշեց Էկոնոմիկայի և գյուղատնտեսության փոխնախարարը:
