16.12.2025 | 16:30
Փոշի, կեղտ, չկառուցված․ Խաչատուր Սուքիասյանը՝ Կենտրոնի մասին․ ՏԵՍԱՆՅՈՒԹ
Քոչարյանն ընդդեմ Մանուկյանի նիստը հետաձգվեց․ դատավորին պատասխանող կողմը բացարկ կհայտնի
Հասարակություն
05.04.2021 | 18:23
Երևանի ընդհանուր իրավասության դատարանում Լիլիթ Սարգսյանի նախագահությամբ այսօր կայացավ ՀՀ երկրորդ նախագահ Ռոբերտ Քոչարյանն ընդդեմ ՀԱԿ փոխնախագահ Արամ Մանուկյանի գործով դատական նիստը։
Քոչարյանը Մանուկյանից պահանջում է հրապարակայնորեն հերքել զրպարտություն համարվող տեղեկատվությունը և հրապարակային ներողություն խնդրել վիրավորանքի համար:
Այսօրվա նիստին Մանուկյանի ներկայացուցիչ Տիգրան Եգորյանը դատարանից ժամանակ խնդրեց` ներկայացված և դատարանի կողմից թույլատրված ապացույցին ծանոթանալու համար։ Ռ.Քոչարյանի ներկայացուցիչն էլ առարկեց՝ նշելով, որ գործը շատ վաղուց է քննվում, արձանագրվել է Ռ. Քոչարյանի` ողջամիտ ժամկետում գործի քննության իրավունքի խախտում, այդ իսկ պատճառով միջնորդությունը ենթակա է մերժման։ Դատարանը, ի վերջո, որոշեց միջնորդությունը մերժել։
Այնուհետև լեզվակռիվ սկսվեց Եգորյանի և նախագահողի միջև. Եգորյանն ուզում էր դիրքորոշում հայտնել ապացույցների վերաբերյալ, դատավորն էլ հնարավորություն չէր տալիս` նշելով, որ դեռևս այդ փուլում չեն։
Ներկայացուցիչը դատարանի պահվածքը կողմնակալ որակեց։ Եգորյանն անցավ հաջորդ միջնորդությանը. նա դատարանից ժամանակ խնդրեց ապացույցներ ներկայացնելու համար, հայցվոր կողմը առարկեց միջնորդության վերաբերյալ, դատարանն էլ նշեց, որ ապացույց ներկայացնելու ժամկետները սպառվել են, ըստ այդմ՝ մերժելով նաև այս միջնորդությունը։
Մանուկյանի ներկայացուցիչ Տիգրան Եգորյանը հայտարարեց, թե դատարանը կողմնակալ է, և ինքը պատրաստվում է բացարկ հայտնել նրան։
Միջնորդությունը գրավոր ներկայացնելու համար դատարանն այսօրվա նիստը հետաձգեց։ Հաջորդը նշանակվեց ապրիլի 22-ին՝ ժամը 14:30-ին։
Լիլիթ Շաբոյան
