Երեխաները լսել են, որ Փաշինյանն իրենց գյուղում է, վազել են դիմավորելու. Ռոմանոս Պետրոսյան. ՏԵՍԱՆՅՈՒԹ

«Ես բացառում եմ՝ որևէ երեխայի դպրոցից կհավաքեն և կբերեն Նիկոլ Փաշինյանի հետ հանդիպման, այն էլ մամուլի ազատության պարագայում ես բացառում եմ նման բան, երեխաները լսել էին՝ երկրի առաջնորդն է գալու և վազել էին այնտեղ»,- այս մասին լրագրողների հետ զրույցում ասաց շրջակա միջավայրի նախարար Ռոմանոս Պետրոսյանը՝ անդրադառնալով Նիկոլ Փաշինյանի այցին Արագածոտնի մարզ։

Նախարարը խոսելով սպասվող արտահերթ ընտրություններին և նշեց՝ դեռ հստակ որոշումներ չունեն, բայց համամասնական ցուցակը գլխավորելու է Նիկոլ Փաշինյանը։ «Դաշինքով ենք գնալու, թե կուսակցությամբ նույնիսկ դեռ այդ որոշումները չունենք, բայց մեծ հաշվով թիմը քաղաքական առաջնորդին է տեսնում ցուցակը գլխավորողի դերում։ «Քաղաքացիական պայմանագիր» կուսակցությունն իր համամասնական ցուցակը ներկայացնելու է ընտրողների դատին Նիկոլ Փաշինյանի գլխավորությամբ»,- տեղեկացրեց նա։

Շրջակա միջավայրի նախարարը նաև նշեց, որ ժողովուրդը չի միացել ընդդիմության բողոքի ցույցերին, իսկ արտահերթ ընտրությունների ժամանակ պարզ կդառնա՝ ում է աջակցում ժողովուրդը։ «Ժողովուրդը ընդդիմության կոչերին ականջալուր չի եղել, և ընդդիմությունը, երկար ժամանակ փակ պահելով գլխավոր պողոտաներից մեկը, վերջնարդյունքում ինքն իր հաշվարկներով հետ հավաքեց իր վրանները և կենտրոնացավ Դեմիրճյան պողոտայում։ Ընտրություններին ժողովուրդն իր քվեով պատասխան կտա՝ ում կողմնակիցն է, և դա կլինի սպառիչ պատասխան բոլորի համար»,- նշեց Պետրոսյանը։

Ռոմանոս Պետրոսյանը նաև ընդգծեց, որ վստահ է իրենց քաղաքական թիմի հաղթանակի հարցում և այդ ինքնավստահությունը գալիս է հանրության ամենալայն շրջանակների հետ շփումներից, այդ հանրության կողմից եկող ազդակներից:

Մանրամասները՝ տեսանյութում: