19.12.2025 | 12:53
Ինչում է ադրբեջանցի դատախազը մեղադրում Ռուբեն Վարդանյանին. մանրամասներ դատական նիստից
ԱՄՆ Պետդեպի պաշտոնյայի ուշագրավ հայտարարությունը ԼՂ-ում ռուս խաղաղապահների մասին
24.03.2021 | 15:32
ԱՄՆ դիվանագետներն ու սենատորները նախօրեին Սենատի արտաքին հարաբերությունների հանձնաժողովում քննարկել են Վրաստանում ստեղծված իրավիճակը։ Քննարկման ժամանակ ունեցած ելույթում ԱՄՆ պետքարտուղարի Եվրոպայի ու Եվրասիայի հարցերով օգնականի տեղակալ Ջորջ Քենթը նաև ուշագրավ հայտարարություններ է արել՝ կապված Լեռնային Ղարաբաղի ու այնտեղ ռուս խաղաղապահների ներկայության հետ։ Նա նշել է, որ Լեռնային Ղարաբաղի պատերազմից հետո ավելի է պետք պաշտպանել Վրաստանի ժողովրդավարացման ջանքերը։
«Վրաստանի արևմտյան կողմնորոշման ամրապնդման ջանքերը հիմա ավելի քան կարևոր են՝ անցյալ տարի Լեռնային Ղարաբաղում ինտենսիվ ռազմական գործողություններից հետո։ Լեռնային Ղարաբաղում ռուսական զորքերի տեղակայումը՝ «խաղաղապահների» տեսքով, նշանակում է, որ Ռուսաստանը Հարավային Կովկասի բոլոր երկրներում դիրքեր ունի։ Թուրքական ու ռուսական զորքերը հիմա Ադրբեջանում դիտարկում են հրադադարի պահպանումը համատեղ մոնիթորինգային կենտրոնում»,- ասել է Քենթը։
Նա նաև անդրադարձել է թուրքական կողմից առաջ մղվող տարածաշրջանային երկրներն ընդգրկող 3+3 ձևաչափին։
«3+3 տարածաշրջանային ձևաչափը, որն առաջարկվում է Ռուսաստանի, Թուրքիայի ու Իրանի կողմից, ուղղված է օգտագործելու այս նոր դինամիկան ու հետագայում մեծացնելու ռուսական, թուրքական և իրանական ազդեցությունները տարածաշրջանում։ Վրաստանը վախենում է, որ արդյունքում շրջափակված կամ բացառված կլինի մրցակցային ենթակառուցվածքային ու զարգացման այլ ծրագրերից։ Մենք հիմա ուղիներ ենք փնտրում, որով ԱՄՆ-ն կարող է ավելի մեծ աջակցություն ցուցաբերել Հարավային Կովկասի երկրների համագործակցությանը՝ պահպանելով նրանց ինքնիշխանությունն ու գործողությունների ազատությունը»,- ասել է ամերիկացի պաշտոնյան։
Էմմա Չոբանյան
