25.08.2026 | 11:30
Երևանում մեկնարկում է Անդրանիկ Հարոյանին նվիրված հուշամրցաշարը, կայացել է վիճակահանությունը
Անշարժ գույքի գները նվազել են, գործարքները՝ կրճատվել
Տնտեսություն
16.03.2021 | 22:14
Նախորդ տարվա տնտեսական ցնցումներից հետո՝ այս տարի ևս անշարժ գույքի շուկայում գործարքների նվազման միտումը շարունակվում է։ Սրան զուգահեռ փոքր-ինչ նվազել են նաև անշարժ գույքի գները։ Այս մասին են վկայում Կադաստրի պետական կոմիտեի հրապարակած տվյալները անշարժ գույքի շուկայում այս տարվա հունվարին կատարված գործարքների վերաբերյալ։
Այսպես՝ Երևանում այս տարվա հունվարին, նախորդ տարվա նույն ամսվա համեմատ, բնակարանների շուկայական միջին գները, 1 քմ-ի հաշվարկներով, 4.9%-ով նվազել են։ Իսկ մարզերում բնակարանների գները 2021-ի հունվարին, նախորդ տարվա հունվարի համեմատ, նվազել են 3.5%-ով։
Հանրապետությունում հունվարին գրանցվել է 8419 իրավունքի պետական գրանցման գործարք՝ 22․4%-ով պակաս նախորդ տարվա նույն ամսվա համեմատ։ Այս թիվն ամենաքիչն է վերջին 4 տարիներին կատարված գործարքների հաշվարկով։
Այս գործարքների մեծ մասը՝ 30․3%-ը, գրանցվել է Երևան քաղաքում, իսկ առավել ցածրը՝ 2․2 %-ը՝ Վայոց ձորի մարզում։
Ըստ գործարքի տեսակների՝ առավել շատ գործարքներ են գրանցվել օտարման վերաբերյալ՝ 35․8%, իսկ առավել քիչ՝ օրինականացման վերաբերյալ՝ 2․8%։
Այսպես՝ 2021 թվականի հունվարին հանրապետությունում գրանցվել է առքուվաճառքի 2264 գործարքը, ինչը 45․1%-ով պակաս է նախորդ տարվա նույն ամսվա համեմատ։ Վարձակալության 531 գործարք է գրանցվել՝ 38․8% պակաս նախորդ տարվա նույն ամսվա համեմատ։
Անժելա Պողոսյան
