17.09.2026 | 14:40
Կոռուպցիոն սկանդալի ֆոնին՝ Զելենսկին Ուկրաինայի գլխավոր դատախազի պաշտոնակատար է նշանակել
Գևորգ Լոռեցյանի գործով դատարանն անցավ ապացույցների հետազոտման փուլին
Հասարակություն
12.03.2021 | 17:33
Երևանի ընդհանուր իրավասության դատարանում, դատավոր Արտուշ Գաբրիելյանի նախագահությամբ, կայացավ ԿԳՄՍ նախկին փոխնախարար Գևորգ Լոռեցյանի գործով դատական նիստը։
Այսօր դատախազ Գևորգ Սարգսյանն ընթերցեց մեղադրական եզրակացության եզրափակիչ մասը։ Ամբաստանյալ Լոռեցյանը նշեց, թե իր համար մեղադրանքը հասկանալի չէ։
Նրա փաստաբան Լևոն Սահակյանն էլ հավելեց, թե չեն հասկանում՝ ինչ է նշանակում «ընդհանուր հովանավորչություն իրականացնելը», ինչպես է դա կատարվել Լոռեցյանի կողմից։
Դատախազը նշեց, թե նիստը զավեշտի է վերածվում, պաշտպանը հակադարձեց՝ զավեշտը մեղադրանքի բովանդակությունն է։
Դատավորը որոշեց անցնել ապացույցների հետազոտման փուլին. նախ՝ գործում առկա փաստաթղթերը կուսումնասիրվեն, ապա կհարցաքննվեն վկաները։
Պաշտպաններից մեկը դատարանին միջնորդեց այսօրվա նիստը հետաձգել, քանի որ այլ գործով նիստի էր։
Լևոն Սահակյանը դատարանին ասաց, որ Լոռեցյանին գրավով ազատ արձակելու միջնորդություն ունի, սակայն դատական նիստը հետաձգվեց։
Հաջորդը նշանակվեց ապրիլի 8-ին՝ ժամը 16:00-ին։
Լոռեցյանը կալանավորվել է 2019-ի դեկտեմբերի 7-ին: Նա չի ընդունում իրեն առաջադրված մեղադրանքը:
Հիշեցնենք՝ ըստ մեղադրական եզրակացության համառոտ բովանդակության՝ Գևորգ Լոռեցյանին մեղադրանք է առաջադրվել այն բանի համար, որ նա «Լուառ» և «Էլիտ Սպորտ» առևտրային կազմակերպությունների սեփականատեր և գործադիր տնօրեն Հրաչիկ Քանանյանից պահանջել է 2 միլիոն ՀՀ դրամ կաշառք՝ իր կողմից ընդհանուր հովանավորչության համար։
Նշենք, որ Վերաքննիչ դատարանում ևս ընթանում են Լոռեցյանի խափանման միջոցը գրավով փոխարինելու վերաբերյալ դատական նիստեր։ Հաջորդը կկայանա մարտի 18-ին։
Լիլիթ Շաբոյան
