24.04.2026 | 22:34
Շատ էի ուզում հենց այս օրը չեմպիոն դառնալ և ստացվեց. Եվրոպայի չեմպիոն Էմմա Պողոսյանը՝ հաղթանակի մասին
Նախագահն իր քայլն է արել, գնդակը բոլոր ուժերի և վարչապետի դաշտում է. Անի Սամսոնյան. ՏԵՍԱՆՅՈՒԹ
Քաղաքականություն
11.03.2021 | 14:01
Կարծում եմ, որ ողջամիտ է, որ այն ուժերը, որոնք ցանկանում են, որ երկրում այս իրավիճակը հանգուցալուծվի, ոչ թե իրավիճակը պետք է ծառայեցնեն իրենց շահերին, այլ պետք է պատրաստակամ լինեն ընդունելու այդպիսի հրավերներ: Այս մասին ԱԺ-ում ճեպազրույցի ժամանակ ասաց ԼՀԿ խմբակցության պատգամավոր Անի Սամսոնյանը՝ անդրադառնալով դիտարկմանը, որ ՀՀ նախագահը վարչապետին, խորհրդարանական խմբակցությունների ղեկավարներին և «Հայրենիքի փրկության շարժման» ղեկավարներին հրավիրել է նախագահական նստավայրում հանդիպման:
«Դա շատ կառուցողական նախաձեռնություն է, և մենք ընդունել ենք այդ հրավերը, և Էդմոն Մարուքյանը կմասնակցի այդ հանդիպմանը: Ես չեմ կարող ասել՝ իրատեսական է, թե ոչ բոլոր ուժերի հանդիպումը մեկ վայրում: Նախագահն իր քայլն է արել, և գնդակը բոլոր քաղաքական ուժերի և փողոցում պայքարող ընդդիմադիր ուժերի լիդերների դաշտում է, ինչպես նաև՝ վարչապետի: Եթե մարդիկ չեն ուզում, որ վիճակը խորանա, պետք է խոսել, այլ տարբերակ չկա: Եթե ուզում են խոսել, նախագահի հրավերը շատ լավ ձևաչափ է, որպեսզի պարզաբանվեն շատ հարցեր, և գանք համաձայնության, թե որն է այս իրավիճակից դուրս գալու ելքը»,- ասաց Սամսոնյանը:
Սամսոնյանի խոսքով՝ ԼՀԿ-ն բազմիցս ներկայացրել է օրակարգը, որն արտահերթ ընտրություններն են: «Դա նաև հանրապետության նախագահի օրակարգն է, դա արդեն նաև բանակի օրակարգն է: Սա դարձել է հանրապետության թիվ մեկ օրակարգը:
Քաղաքական կամքն է խանգարում, որպեսզի գնանք արտահերթ խորհրդարանական ընտրությունների: Նախ՝ իշխանության քաղաքական կամքը, քանի որ մենք արդեն հասկացանք, որ իշխանությունն իրականում զբաղեցնում է հրապարակներ, մարդկանց խաբելով, որ ինքը կարող է գնալ այդ քայլին և անել արտահերթ ընտրություններ, եթե խորհրդարանական ընդդիմությունն ընդառաջ գա:
Մենք ընդառաջ ենք գնացել, անգամ ասել ենք, թե որ դեպքում կարող են դա անել, բայց եթե իշխանությունն այդ կամքն ունենար, ապա մենք կլինեինք մի իրավիճակում, երբ վարչապետն արդեն հրաժարական տված կլիներ: Բայց մենք տեսնում ենք, որ այդ քայլը չի արվում և փորձ է արվում ընդամենը մարդկանց խաբել, թե իշխանությունն ուզում է գնալ արտահերթ ընտրությունների»,- նշեց Սամսոնյանը:
Մանրամասները՝ տեսանյութում:
