Քաղաքականություն
01.02.2018 | 18:43Կինոռեժիսոր և հասարակական գործիչ Տիգրան Խզմալյանը Factor.am-ի հետ զրույցում «Ռուսաստանին հայտարարված պատերազմ» է համարում ԱՄՆ ֆինանսների նախարարության օրերս հրապարակած «Կրեմլյան զեկույցը»:
«Հունվարի 29-ից աշխարհը մտել է մի նոր փուլ: Ես դա ինձ թույլ եմ տալիս անվանել նոր համաշխարհային պատերազմ: Երբ որ աշխարհի ամենամեծ երկրի ամբողջ քաղաքական համակարգը, բոլոր նախարարները, ամբողջ օրենսդիր և գործադիր իշխանությունը հայտարարվում են օրենքից դուրս, դա նշանակում է, որ սա պատերազմ է: Սա Ռուսաստանին հայտարարված պատերազմ է և թերագնահատել դա պետք չէ»,- տեսակետ հայտնեց կինոռեժիսորը:
Խզմալյանը նաև նկատեց, որ եթե նախկինում Ռուսաստանը կամ չէր հիշատակվում որպես հակառակորդ, կամ գոնե Չինաստանից հետո էր այդ ցանկում, ապա հիմա գլխավորեց ԱՄՆ թշնամիների ցուցակը:
Նշենք, որ այդ մասին հայտարարել է ԱՄՆ նախագահ Դոնալդ Թրամփը: «Այն նահանջը, որ Ռուսաստանը ապրում էր տարիներ շարունակ, հիմա փաստորեն արձանագրվել է պաշտոնապես: Դա նշանակում է, որ գիծ է քաշված և Հայաստանն այլևս չի կարող խուսանավել, պետք է հայտարարի՝ գծի որ մասում է գտնվում»,- անդարդառնալով Հայաստանի անելիքներին՝ ասաց Խզմալյանը:
Հարցին, թե հնարավո՞ր է արդյոք տարանջատվել Ռուսաստանից՝ հատկապես, հաշվի առնելով, թե ինչ կապեր ունի Հայաստանի իշխանությունը Ռուսաստանի հետ, կինոռեժիսորը պատասխանեց. «Հայաստանը Սերժ Սարգսյանը չէ: Խոսքերի մակարդակով Հայաստանի իշխանությունը փորձելու է չվիրավորել Պուտինի ռեժիմը՝ հաշվի առնելով, որ սատկող վիշապը շատ վտանգավոր է: Սակայն Հայաստանի իշխանությունն էլ ինքնասպան չէ և հասկանում է, որ պետք է որքան հնարավոր է՝ հեռու մնա Ռուսաստանից, որովհետև Ռուսաստանը մտել է իր համար շատ ծանր և ճակատագրական փուլ»:
Ինչ վերաբերում է Ռուաստանում «Ստալինյան վախճանը» ֆիլմի արգելքին, կինոռեժիսորը կարծում է, որ ժամանակին հենց Ռուսաստանում այդ թեմայով շատ ավելի լավ ֆիլմեր են նկարվել. «Իսկ այն, որ Ռուսաստանն արգելել է ֆիլմը Ստալինի մահվան մասին, շատ բնական է, որովհետև ներկա, Պուտինյան ռեժիմի Ռուսաստանում Ստալինը չի մահացել»:
Մանրամասները դիտեք Տիգրան Խզմալյանի հետ Factor.am-ի հարցազրույցում:
Մարինե Խառատյան
