Սուսաննա Գաբոյանը դարձավ Հայաստանի չեմպիոն, Գաբուզյանը պոկվեց Փաշիկյանից

Երևանի շախմատի տանը ավարտվեց շախմատի կանանց Հայաստանի 76-րդ առաջնությունը: Այն անակնկալ ավարտ ունեցավ:

Վերջին տուրում միանձնյա առաջատար և ռեյտինգ-ֆավորիտ, Հայաստանի քառակի չեմպիոն Մարիա Գևորգյանը սպիտակներով պարտվեց Սիրանույշ Ղուկասյանին: Իսկ ահա նրանից կես միավորով հետ մնացող Սուսաննա Գաբոյանը սպիտակներով պարտության մատնեց Վերոնիկա Խաչատրյանին, և, վաստակելով 6.5 միավոր, դարձավ Հայաստանի չեմպիոն: Իսկ Գևորգյանը մնաց 6 միավորով և 2-3-րդ տեղերը կիսեց Մարիամ Մկրտչյանի հետ: Վերջինս եզրափակիչ՝ 9-րդ տուրում սպիտակներով պարտության մատնեց Մարիամ Ավետիսյանին: Լրացուցիչ ցուցանիշներով երկրորդ տեղը զբաղեցրեց Ավետիսյանը, իսկ Գևորգյանը ստիպված էր բավարարվել բրոնզե մեդալով:

Նշենք, որ վանաձորցի Սուսաննա Գաբոյանը երկրորդ անգամ է նվաճում Հայաստանի չեմպիոնի կոչումը: Նախորդ անգամ նա ոսկե մեդալակիր էր դարձել 2015թ.-ին:

Տղամարդկանց մրցաշարում այսօր տեղի ունեցան 9-րդ տուրի պարտիաները: Միանձնյա առաջատար Հովհաննես Գաբուզյանը սևերով պարտության մատնեց Տիգրան Հարությունյանին: Գաբուզյանին մոտակա մրցակիցը՝ Արման Փաշիկյանը ոչ-ոքի խաղաց Շանթ Սարգսյանի հետ: Այսպիսով, 9 տուրից հետո Գաբուզյանն ունի 7.5 միավոր և արդեն մեկ միավորով է գերազանցում երկրորդ տեղում ընթացող Փաշիկյանին: Երրորդ հորիզոնական բարձրացավ Սամվել Տեր-Սահակյանը, որը 9-րդ տուրում ոչ-ոքի խաղաց Հայկ Մարտիրոսյանի հետ: Տեր-Սահակյանն իր ակտիվում ունի 6 միավոր:

Ավելացնենք, որ տղամարդկանց Հայաստանի առաջնությունը կավարտվի փետրվարի 28-ին: