17.09.2026 | 18:59
Թուրք ընդդիմադիր պատգամավորը Հայաստան-Թուրքիա սահման է այցելել և կոչ է արել բացել այն
Սամվել Ալեքսանյանը 25-րդ սուպերմարկետն է բացում Երևանում. փոքր խանութների սեփականատերերն ահազանգում են
19.02.2021 | 21:57
Ազգային ժողովի ՀՀԿ խմբակցության նախկին պատգամավոր, խոշոր գործարար Սամվել Ալեքսանյանի ընտանիքին պատկանող «Երևան սիթի» սուպերմարկետների ցանցը Երևանում շուտով 25-րդ մասնաճյուղն է բացելու: Այն տեղակայված է լինելու Մաշտոցի պուրակին հարակից գետնանցումում, որտեղ այժմ ակտիվ շինարարական աշխատանքներ են ընթանում:
Շինհրապարակում փակցված գովազդային պաստառներից պարզ է դառնում, որ տարածքում գործելու է նաև Ալեքսանյանին պատկանող սուպերմարկետի հերթական մասնաճյուղը: Ուշագրավ է, որ Մաշտոցի պողոտայում՝ Փակ շուկայի տարածքում, արդեն իսկ գործում է «Երևան սիթի»-ի հսկայական մասնաճյուղը:
Մաշտոցի պուրակի շրջակայքում փոքր խանութներ և կրպակներ շահագործող տնտեսվարողները տարակուսած են՝ ինչպե՞ս կարելի է թույլ տալ գրեթե կողք կողքի երկու «Երևանի սիթի»-ի գործունեությունը, երբ իրենք, կորոնավիրուսով և պատերազմով պայմանավորված, արդեն լուրջ խնդիրներ ունեն:
Հիշեցնենք՝ Սամվել Ալեքսանյանն իշխանափոխությունից հետո, ի զարմանս հեղափոխության բազմաթիվ մասնակիցների, ջերմ հարաբերությունների հաստատեց քաղաքական ղեկավարության հետ: Վարչապետ Նիկոլ Փաշինյանը նրան ընդունում է կառավարությունում, այցելում Ալեքսանյաններին պատկանող ընկերություններ, թեև բոլորն են հիշում, թե ինչպես էր Փաշինյանը մինչ այդ քննադատում Սամվել Ալեքսանյանին:
Նարեկ Կիրակոսյան
