14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
Ներարկումներն անում էինք մեքենայի մեջ՝ կրակի տակ. 25-ամյա բժշկի մարտական մկրտությունը. ՏԵՍԱՆՅՈՒԹ
Հասարակություն
15.02.2021 | 18:33
Սկզբում հույս չուներ, որ նույնիսկ հենակներով կկարողանա քայլել, իսկ 4 ամիս անց արդեն քայլում է առանց հենակների։ Ռոման Օհանյանն է, Մխիթար հերացու անվան բժշկական համալսարանի ուսանողից՝ շտապօգնության բժիշկ, ապա բուժծառայության լեյտենանտ Արցախում՝ Խոջալուում։
Հոկտեմբերի 10-ին վիրավորներին փրկողը ինքն էր փրկության կարիք ունենալու։ Շտապօգնության մեքենան չէր հասցրել վիրավորներին հասնել, երբ մեքենան շրջվեց։
«Դեպի Մարտակերտ գնացող Աղդամի ճանապարհին էր։ Մեր մեքենան չէր հասցրել մոտենալ վիրավորին։ Հրետանային հարվածները շատ ուժեղ էին ու հրետանային կրակների տակ մեր մեքենան կողաշրջվեց»,- պատմում է նա։
Մեքենայում, վարորդից ու Ռոմանից բացի, բուժծառայության պետ Նարեկ Մեսրոպյանն էր։ Նրա կյանքը, սակայն, փրկել չէր հաջողվելու։
Նարեկ Մեսրոպյանը ապրիլյան պատերազմից եղնիկների հայտնի բժիշկն էր։
Էլի ընկերներ է կորցրել՝ թե՛ մարտական, թե՛ ուսանողական։ Ասում է՝ այդ ցավերի կողքին ֆիզիկական ցավը հաղթահարելի է դառնում։ Ռոմանի ոտքի, ձեռքի բազմաբեկոր վնասվածքները դեռ վերականգնման փուլում են։ Պատերազմական ապրումները՝ թարմ․ 15 օր առանց հանգստի ու դադարի փորձել են մի կյանք ավելի փրկել։
Ռոմանն ասում է՝ 15 օր իր տեսած պատերազմից ամենադժվարը առաջին օրն էր․ դեռ պատրաստ չէր, հատկապես՝ հոգեպես։ Հենց այդ օրն էլ մարտական մկրտությունն էր ստանալու՝ պատերազմի առաջին իսկ ժամերին փրկելով 18 տարեկան զինվորի կյանքը։
Աշխատել նոր ժամանակների պատերազմի կանոններով՝ ոչ դասագրքային։ Ո՛չ ֆիլմերում տեսած, ո՛չ էլ գրքերում կարդացած պատերազմներն Արցախյանի հետ ընդհանրություններ չունեին։
Պատերազմ, որը ոչ միայն փոխեց բոլորին, այլ դարձավ կյանքը, խաղաղության գինը։ Բայց անփոփոխ մնաց Ռոմանի սերը դեպի իր մասնագիտությունը։ Իր օգնությամբ փրկված հարյուրավոր կյանքերն է Ռոմանը համարում իր հաղթանակը, իսկ կրկին սպիտակ խալաթ հագնելը՝ երազանքը։
Մանրամասները՝ տեսանյութում։
Իրինա Մկրտչյան
